Гулистон: Таъмири муассисаҳои тиббӣ ба маблағи 504 ҳазор сомонӣ

Душанбе, 1.11.2016. /АМИТ «Ховар»/. Дар шаҳри Гулистони вилояти Суғд бахшида ба «Соли 2016 — Соли фарди солим» аз ҷониби кормандони соҳаи тандурустии шаҳр ва Маркази ташаккули тарзи ҳаёти солим барномаҳои «Дӯконҳои саломатӣ» ва «Дӯконҳои саломатии сайёр» доир шуданд. Ин барномаҳо дар маркази шаҳр ва шаҳракҳо оид ба пешгирии бемориҳои ботулизм, камйодӣ, зуком, сил, ҳорӣ ташкил карда шуда, вобаста ба он ба аҳолӣ маълумоти муфассал пешниҳод ва маводи иттилоотӣ тақсим карда шуданд. Дар ин бора аз мақомоти иҷроияи ҳокимияти давлатии шаҳри Гулистон иттилоъ доданд.
Дар давоми нуҳ моҳи соли равон ба соҳаи тандурустии шаҳр бо қарорҳои раиси шаҳр барои таъминоти иштирокчиёни Ҷанги дуюми ҷаҳон ва ашхоси ба онҳо баробаркардашуда 24,9 ҳазор сомонӣ, таъминоти кӯдакони то сесола ва маъюбони модарзоди то 18-сола бо доруворӣ 13,3 ҳазор сомонӣ, барои расонидани кумак ба занҳои нахустҳомила 21,5 ҳазор сомонӣ ва барои хуни бехатарии донорӣ 4000 сомонӣ маблағ аз буҷети маҳаллӣ ҷудо карда шудааст.
Аз суратҳисоби махсуси муассисаҳои тандурустӣ ба маблағи 41,6 ҳазор сомонӣ ва аз буҷети маҳаллӣ ба маблағи 119 ҳазор сомонӣ, 7,1 ҳазор сомонӣ аз ҳисоби ташкилотҳои байналмилалӣ, дар маҷмӯъ, аз ҳамаи сарчашмаҳои маблағгузорӣ ба маблағи 267,8 ҳазор сомонӣ таҷҳизоти тиббӣ харида шуданд. Дар ин муддат ба маблағи 504 ҳазор сомонӣ таъмири муассисаҳои тандурустии маркази шаҳр, шаҳракҳои Консой, Адрасмон ва Навгарзан ба анҷом расидааст.