Ҳиммати Ғайрат, раиси ноҳияи Сангвор: «Ба шарофати қабули Конститутсия раванди демократикунонии ҷомеа амалӣ гардид»

Сангвор, 04.11.2016 /АМИТ «Ховар»/. Имрӯз дар Қасри фарҳанги ноҳияи Сангвор бахшида ба 22-умин солгарди Рӯзи Конститутсияи Ҷумҳурии Тоҷикистон маҷлиси тантанавӣ ва барномаи консертӣ доир шуд.
Раиси ноҳияи Сангвор Ҳиммати Ғайрат иброз дошт, ки «бо шарофати қабули Конститутсия дар Ҷумҳурии Тоҷикистон раванди демократикунонии ҷомеа амалӣ шуда, ҳуқуқу озодиҳои шаҳрвандон таъмин гардид. Вобаста ба ин тамоми рукнҳои давлатдории навин дар чаҳорчӯбаи муайян фаъолият доранд. Дар ин замина вобаста ба шароит дар пешрафту тақвияти ҳифзи иҷтимоии аҳолӣ, тандурустӣ, илм, фарҳанг, маориф ҳисса гузоштан ва пайвастани он ба арзишҳои умумибашарӣ, ки унсурҳои муҳими давлати иҷтимоӣ маҳсуб меёбанд, вазифаи муқаддаси ҳар як фарди ватандӯст мебошад».
Ҳамчунин роҳбарони мақомоти ҳифзи ҳуқуқи ноҳия ва собиқадорон сухан гуфта, ҳозиринро бо ин санаи тақдирсоз табрик намуданд.