Имтиёзҳо ба намояндагиҳои ширкатҳои ҳавонавардии Тоҷикистон ва Чин

Ноябрь 2, 2016 14:36

Душанбе, 02.11.2016/АМИТ «Ховар»/. Парлумони Тоҷикистон 2 ноябр Созишномаи байни Ҳукумати Ҷумҳурии Тоҷикистон ва Ҳукумати Ҷумҳурии Мардумии Чин оид ба ҳавопаймоии гражданиро ба тасвиб расонд, ки тибқи он намояндагиҳои ширкатҳои ҳавонавардии ду кишвари ҳамҷавор- Тоҷикистон ва Чин ҳангоми ворид намудани қисмҳои эҳтиётӣ ва дигар таҷҳизоти бахши ҳавопаймоӣ аз пардохти боҷи гумрукӣ, андоз ва дигар пардохтҳо озод мегарданд.
Шералӣ Ганҷалзода, вазири нақлиёти Ҷумҳурии Тоҷикистон дар Парлумони мамлакат гуфт, ки ҳадафи асосии Созишномаи мазкур таҳкими ҳамкории Тоҷикистону Чин дар бахши авиатсияи гражданӣ буда, он соли 2007 дар Пекин ба имзо расидааст. Вазир афзуд, ки ба тасвиб расидани санади мазкур ба рушди иқтисодиёти кишвар, хусусан тавсеаи бахши туризм дар мамлакат мусоидат менамояд. Ба андешаи Шералӣ Ганҷалзода, алҳол байни Тоҷикистон ва Чин дар як ҳафта 8 парвоз аз ҷониби ширкатҳои ҳавопаймоии «Сомон-Эйр», «Тоҷик-Эйр» ва ширкати ҳавонавардии Чин сурат мегиранд, ки дар интиқоли мусофирон, бор ва дигар хизматрасониҳо нақши муҳим доранд. Инчунин ба тасвиб расонидани санади мазкур аз ҷониби вакилони Парлумони Тоҷикистон дар самти ба роҳ мондани хатсайри Душанбе- Пекин асоси ҳуқуқӣ фароҳам оварда, ҷиҳати дастрас кардани таҷҳизот ва дигар қисмҳои эҳтиётӣ барои ҳавопаймои сохти чинии «МА -60», ки онро Тоҷикистон аз Чин харидорӣ намудааст, заминаи мусоид фароҳам меорад.
Вазири нақлиёти кишвар ҳамзамон дар Парлумони кишвар ба саволҳои сершумори вакилон, ки фарогири бахши ҳавонавардии мулкӣ, хусусан гаронии нархи чиптаҳои ҳавопаймоӣ дар кишвар, баланд бардоштани сатҳи хизматрасонӣ дар фурудгоҳҳо, ҷалби сармоягузорони хориҷӣ бобати рушди соҳа, вазъи молиявии ширкатҳои ҳавонавардии ватанӣ буд, посухҳои мушаххас дод. Шералӣ Ганҷалзода афзуд, ки мутахассисони Вазорати нақлиёти кишвар дар ҳамкорӣ бо дигар сохторҳои марбута вазъ ва мушкилоти соҳаи ҳавонавардии кишварро ҳаматарафа омӯхта, барои бартараф кардани он тадбирҳои самарабахш меандешанд.

Ноябрь 2, 2016 14:36

Хабарҳои дигари ин бахш

Имрӯз дар шаҳри Душанбе ҳаво то 31 дараҷа гарм мешавад
«ТОЗАГИИ СОҲИЛ». Дар сойи Тебалайи шаҳри Кӯлоб ҳашари тозагӣ гузаронида шуд
Дар Душанбе ҷаласаи IX Шурои байнидавлатии муқовимат ба коррупсия доир мегардад
Имрӯз дар ноҳияҳои водигии Тоҷикистон ҳаво то 34 дараҷа гарм мешавад
Ҳайати Тоҷикистон дар иҷлосияи 68-уми Конфронси умумии Агентии байналмилалии неруи атомӣ дар Вена иштирок дорад
Чат-боти Доно доир ба кор бо муроҷиати муштариён маълумот медиҳад
Имрӯз дар Тоҷикистон ҳаво то 28 дараҷа гарм мешавад
Дар Душанбе ҳамкории Тоҷикистон бо Созмони ҷаҳонии исломӣ оид ба масъалаҳои маориф, илм ва фарҳанг баррасӣ шуд
Донишгоҳи техникии Тоҷикистон ва Донишкадаи технологияҳои иттилоотии Чанчжоуи Чин ҳамкориро густариш медиҳанд
Сохтмони 36 манзили истиқоматӣ дар деҳаи Сурхоби ноҳияи Фархор ба андозаи 90 фоиз иҷро шудааст
СОЛИ МАЪРИФАТИ ҲУҚУҚӢ. Гурӯҳи корӣ бо сокинону фаъолони шаҳри Хоруғ вохӯрӣ анҷом дод
Имрӯз дар ноҳияҳои алоҳидаи кӯҳии Тоҷикистон борони кӯтоҳмуддат меборад