Китобхонаи миллии Тоҷикистон дар радифи китобхонаҳои бонуфузтарини ҷаҳон қарор дорад

Душанбе, 04.11.2016 /АМИТ «Ховар»/. Дар мулоқоте, ки имрӯз дар Донишкадаи соҳибкорӣ ва хизмати Вазорати саноат ва технологияҳои нави Ҷумҳурии Тоҷикистон бо кормандони масъули Муассисаи давлатии «Китобхонаи миллии Тоҷикистон» доир гардид, зикр шуд, ки «ҷалби ҳарчӣ бештари ҷавонон ба китобхона ва китобхонӣ, инчунин бедорсозии рағбати онҳо нисбат ба китоб амри зарурист». Дар ин бора аз Донишкадаи соҳибкорӣ ва хизмати Вазорати саноат ва технологияҳои нави Ҷумҳурии Тоҷикистон ба АМИТ «Ховар» иттилоъ доданд.
«Маҳз китоб метавонад ба болоравии маърифати ҷавонон, мустаҳкамсозии донишу малакаи касбӣ ва роҳандозии зиндагии шоистаи онҳо кумак расонад»,-зикр шуд дар ҷамъомад.
Сардори шуъбаи адабиёт оид ба фарҳанг ва ҳунари Китобхонаи миллии Тоҷикистон Нуқра Аҳмадова оид ба фаъолияти ин боргоҳи маънӣ, тарзу усули истифода аз хазинаи пурганҷи китобхона, одоби китобхонӣ, махсусияти толорҳои китобхона ва намудҳои хизматрасонӣ дар китобхона маълумот дода, гуфт: «Имрўз Китобхонаи миллии Тоҷикистон дорои 5 705 046 нусха маводи чопию электронӣ буда, аз ҷиҳати дороии хазина ва меъёрҳои хизматрасонӣ дар радифи китобхонаҳои бонуфузтарини ҷаҳон қарор дорад».
Масъулини Китобхонаи миллии Тоҷикистон донишҷӯёнро даъват карданд, ки бештар ба китобхона рў оранд ва аз ин махзани илму маърифат баҳра баранд, зеро китоб роҳнамои зиндагист.