КМИР ваколати вакили нави Маҷлиси намояндагонро тасдиқ намуд

Душанбе, 02.11.2016. /АМИТ «Ховар»/. Имрӯз, 02 ноябри соли 2016 таҳти роҳбарии Раиси Комиссияи марказии интихобот ва раъйпурсии Ҷумҳурии Тоҷикистон Худоёрзода Бахтиёр Тавар ҷаласа баргузор гардид, ки дар он масъалаҳои додани мандати вакили Маҷлиси намояндагони Маҷлиси Олии Ҷумхурии Тоҷикистон аз ҳавзаи ягонаи умумиҷумҳуриявӣ ба Шарифӣ Фирӯза Бурихонзода, бақайдгирӣ ва тасдиқи ваколати ӯ баррасӣ гардиданд.
Хотиррасон бояд намуд, ки бо қарори Маҷлиси намояндагони Маҷлиси Олии Ҷумхурии Тоҷикистон аз 26-уми октябри соли 2016, №577 ваколати вакили Маҷлиси намояндагони Маҷлиси Олии Ҷумхурии Тоҷикистон аз ҳавзаи ягонаи умумиҷумҳуриявӣ Муҳиддиниён Пӯлод Муҳиддин бо сабаби ба вазифаи дигар таъйин шуданаш пеш аз муҳлат қатъ гардид.
Мувофиқи моддаҳои 12, 54, 56 ва 57 Қонуни конститутсионии Ҷумхурии Тоҷикистон «Дар бораи интихоботи Маҷлиси Олии Ҷумхурии Тоҷикистон» Комиссияи марказии интихобот ва раъйпурсӣ қарор кард, ки мандати вакили Маҷлиси намояндагони Маҷлиси Олии Ҷумхурии Тоҷикистон аз ҳавзаи ягонаи умумиҷумҳуриявӣ мувофиқи рӯйхати дахлдори Ҳизби Халқии Демократии Ҷумхурии Тоҷикистон ба Шарифӣ Фирӯза Бурихонзода дода шавад.
Комиссия инчунин Шарифӣ Фирӯза Бурихонзодаро ҳамчун вакили Маҷлиси намояндагони Маҷлиси Олии Ҷумхурии Тоҷикистон ба қайд гирифта, ваколаташро тасдиқ намуд.