Кумитаи ҳифзи муҳити зист дар шаҳри Хоруғ давраи омӯзишии «Тағйирёбии иқлим ва роҳҳои мутобиқшавӣ ба он»-ро гузаронид

Хоруғ, 17.11.2016. /АМИТ «Ховар»/. Кумитаи ҳифзи муҳити зисти назди Ҳукумати Ҷумҳурии Тоҷикистон барои мутахассисону кормандони ситоди вазъи фавқулода, ҷамоатҳои деҳот, идораи обу ҳавосанҷии ВМКБ вобаста ба тағйирёбии иқлим ва коҳиши омилҳои инсонии мусоидат ба болоравии гармии ҳаво дар шаҳри Хоруғ давраи омӯзишӣ баргузор кард. Дар ин бора ба хабарнигори АМИТ «Ховар» сардори Раёсати ҳифзи муҳити зисти вилоят Мулкамон Назаралиев хабар дод.
«Яке аз ҳадафҳои аслии ин омӯзиш- баланд бардоштани маърифати экологии шаҳрвандон ба шумор меравад, зеро сол аз сол иқлими сайёра рӯ ба гармӣ меорад ва бар асари он пиряхҳо низ бо суръати баланд об мешаванд. Аз меъёр зиёд об шудани пиряхҳо ба баланд шудани сатҳи оби кӯлу рӯдхонаҳо оварда, барои сокинони ин ё он минтақа хатари бузург эҷод мекунад .Ҳамагӣ як сол пеш бо чашми худ офати табииро, ки дар деҳаи Барсеми ноҳияи Шуғнон рух дод, мушоҳида намудем. Дар натиҷаи ин офати табиӣ наздики 80 оила бе сарпаноҳ гаштанд»,-изҳори ақида кард мутахассиси соҳаи экологияи вилоят Салима Имомназарова.
Ба андешаи мутахассисони соҳаи экологияи вилоят, ин гуна офатҳои табиӣ ҳар як инсонро бори дигар водор месозанд, ки нисбат ба муҳити атроф бетараф набошад. Дар ҳифзу нигаҳдории муҳити зист, олами набототу ҳайвонот ва захираҳои об саҳми худро гузорад. Чунки гармшавии аз ҳад зиёди ҳаво баъзе аз набототу ҳайвонотро низ ба нобудӣ мерасонад.
«Дар давраи омӯзишӣ гуфта шуд, ки ҳарчанд кишвари мо дар муқоиса бо кишварҳои ҳамсоя ба табиат камтар осеб мерасонад, аммо сарфи назар аз ин корҳои ташвиқотиву тарғиботиро миёни кӯдакону наврасон бояд бештар ба роҳ монем»,-хабар дод манбаъ.