Қоҳир Расулзода: «Тоҷикистон ба узвияти худ дар СҲШ афзалияти бештар медиҳад»

Ноябрь 3, 2016 16:10

Душанбе, 03.11.2016. /АМИТ «Ховар»/. Имрӯз дар шаҳри Бишкеки Ҷумҳурии Қирғизистон ҷаласаи 15-уми Шӯрои сарони ҳукуматҳо-сарвазирони кишварҳои аъзои Созмони ҳамкории Шанхай баргузор шуд, ки дар кори он Сарвазири мамлакат Қоҳир Расулзода иштирок намуд.
Қабл аз оғози ҷаласаи навбатӣ Сарвазири мамлакат дар мулоқоти Президенти Ҷумҳурии Қирғизистон Алмазбек Атамбоев бо роҳбарони ҳайатҳои расмӣ ширкат варзид.
Кори ҷаласаи 15-уми Шӯрои сарони ҳукуматҳо-сарвазирони кишварҳои аъзои Созмони ҳамкории Шанхай нахуст бо вохӯрии хосаи роҳбарони ҳайатҳои иштирокчӣ оғоз гардида, баррасии масъалаҳои рӯзномаи ҷаласа дар нишасти доираи васеъ идома ёфт.
Сарвазири мамлакат Қоҳир Расулзода зимни суханронии худ дар нишасти доираи васеи ҳайатҳо, аз ҷумла, таъкид дошт, ки Ҷумҳурии Тоҷикистон ба узвияти худ дар Созмони ҳамкории Шанхай афзалияти бештар дода, ба рушди муносибатҳои дӯстона ва ҳамҷаворӣ бо давлатҳои аъзои ин созмони муътабари ҷаҳонӣ таваҷҷуҳи зарурӣ зоҳир менамояд. Тавре таъкид гардид, соли равон кишварҳои аъзои созмон 15 соли узвияти худро дар Созмони ҳамкории Шанхай натиҷагирӣ карда, нақшаю ниятҳои минбаъдаи худро, ки дурнамои рушди муносибатҳои байнидавлатии кишварҳои аъзоро фаро мегирад, тарҳрезӣ менамоянд.
Ба таъкиди Сарвазири мамлакат, Тоҷикистон ҳамчун аъзои фаъоли Созмони ҳамкории Шанхай ба рушди муносибатҳои байниҳукуматии давлатҳои аъзо дар соҳаҳои иқтисоду тиҷорат, роҳу нақлиёт, саноат, энергетика ва сармоягузорӣ аҳамияти зарурӣ дода, аз таъсиси камарбанди иқтисодӣ дар доираи Роҳи бузурги абрешим ва татбиқи якҷояи лоиҳаҳои бузурги минтақавии сохтмони роҳҳои оҳан ҷонибдорӣ менамояд.
Дар ҷаласаи навбатии Шӯрои сарони ҳукуматҳо-сарвазирони давлатҳои аъзои Созмони ҳамкории Шанхай ба фаъолияти минбаъдаи Иттиҳоди байнибонкӣ ва дигар шӯроҳои назди созмон, корҳои ташкилию молиявии он, таъсиси Донишгоҳи Созмони ҳамкории Шанхай, Бонк ва Хазинаи рушди созмон таваҷҷуҳи зарурӣ зоҳир гардида, оид ба масъалаҳои рӯзномаи корӣ Эъломияи муштараки роҳбарони ҳайатҳо ва қарорҳои дахлдор қабул карда шуданд.
Сарони ҳукуматҳо-сарвазирони давлатҳои аъзои Созмони ҳамкории Шанхай зимни нишасти навбатии худ ҳамчунин масоили марбут ба ҳамдастии муштарак дар мубориза ба зуҳуроти номатлуби ҷаҳони муосирро мавриди баррасӣ қарор дода, омодагию ҳавасмании кишварҳои худро барои рушду тавсеаи ҳамкорӣ дар ин самт таъкид намуданд.
Кори ҷаласаи навбатӣ дар нишасти матбуотӣ бо иштироки намояндагони сершумори васоити ахбори омма натиҷагирӣ шуда, раёсат дар Шӯрои сарони ҳукуматҳо-сарвазирони давлатҳои аъзои Созмони ҳамкории Шанхай ба ҷониби Федератсияи Русия вогузор гардид.
Маврид ба ёдоварист, ки дар доираи ҷаласаи 15-уми Шӯрои сарони ҳукуматҳо-сарвазирони давлатҳои аъзои Созмони ҳамкории Шанхай мулоқоти Сарвазири мамлакат Қоҳир Расулзода бо Раиси Шӯрои давлатии Ҷумҳурии Мардумии Чин Ли Кетсян баргузор гардид. Дар мулоқот вазъ ва дурнамои ҳамкории байниҳукуматии Тоҷикистон ва Чин, инчунин ҷараёни иҷрои тавофуқоти дар сатҳи роҳбарони олии ду давлат бадастомада мавриди баррасӣ қарор дода шуд.

Ноябрь 3, 2016 16:10

Хабарҳои дигари ин бахш

Дар Сарраёсати ҳифзи муҳити зист дар шаҳри Душанбе Маркази мониторинги камераҳои мушоҳидавӣ фаъол гардид
Имрӯз дар Тоҷикистон ҳаво тағйирёбанда шуда, борон ва раъду барқ пешгӯӣ мешавад
Дар ноҳияи Файзобод бо фаъолону собиқадорон ва ходимони дини деҳоти Чашмасор мулоқот доир гардид
Дар ду қисми низомии тобеи Вазорати корҳои дохилии Тоҷикистон дастархони идона ороста гардид
Дар ноҳияи Деваштич маъракаи кишти картошка оғоз шуд
Иҷлосияи нуздаҳуми Маҷлиси вакилони халқи вилояти Хатлон, даъвати шашум доир гардид
Дар пайравӣ ба амалҳои хайрхоҳонаи Президенти Тоҷикистон дар якчанд қисми ҳарбӣ дастурхони идона ороста шуд
Дар Неругоҳи барқи обии «Норак» ҷашни байналмилалии Наврӯз бо шаҳомати хосса таҷлил гардид
Имрӯз дар Тоҷикистон ҳаво тағйирёбанда шуда, борон ва раъду барқ пешгӯӣ мешавад
Наврӯз ҳамчун ҷашни эҳёи табиат истифодаи оқилонаи заминро талқин менамояд
Кишоварзони ноҳияи Зафаробод дар 120 гектар картошкаи барвақтӣ кишт менамоянд
Дар Агентии содироти Тоҷикистон бо намояндагони Агентии назорати давлатии молиявӣ ва мубориза бо коррупсия вохӯрӣ доир шуд