«Президент аз нигоҳи кӯдакон»: кӣ ғолиби озмуни расми беҳтарин гардид?

Душанбе, 16.11.2016. /АМИТ «Ховар»/. Имрӯз бо мақсади дарёфти беҳтарин расм дар мавзӯи «Президент аз нигоҳи кӯдакон» озмуни расми беҳтарин байни таълимгирандагони маҳфили расмкашии Муассисаи давлатии «Маркази наврасони шаҳри Душанбе» ва марказҳои эҷодии кӯдакон ва наврасони ноҳияҳои пойтахт бахшида ба Рӯзи Президент баргузор гардид. Дар ин бора Иброҳим Иброҳимов, муовини директори Муассисаи давлатии «Маркази кӯдакон ва наврасон» хабар дод.
«Ба озмуни мазкур 40 адад расм пешниҳод гардида, беҳтарин расм ва ғолиби озмун муайян шуд. Тибқи натиҷаи озмун ҷои якум насиби Андрей Костамаров, хонандаи синфи 11 мактаби № 54, ҷои дуюм насиби Фатҳиддин Муминов, хонандаи синфи 11 гимназияи №1, Умар Ҳамроев, хонандаи синфи 4 мактаби № 24 ва ҷои сеюм насиби Азамат Боқиев, хонандаи синфи 5 мактаби № 42- и ноҳияи Фирдавсӣ ва Нилуфар Норматова, хонандаи синфи 6 гимназияи №9 гардид»,-хабар дод манбаъ. Ғолибон бо ифтихорномаҳои Маркази кӯдакон ва наврасон ва туҳфаҳои хотиравӣ қадрдонӣ шуданд.