Суғд: Дар як моҳ ба маблағи 740 млн сомонӣ маҳсулоти саноатӣ истеҳсол гардид

Хуҷанд, 11.11.2016. /АМИТ «Ховар»/. Танҳо дар давоми моҳи октябри соли равон коргоҳҳои саноатии вилояти Суғд ба маблағи беш аз 700 млн сомонӣ маҳсулот истеҳсол намуданд. Ин нишондод дар таърихи навини соҳибистиқлолии кишвар натиҷаи баландтарин ба ҳисоб меравад. Бояд гуфт, ки бо баланд кардани суръати рушд то 151,3 фоиз, маблағи умумии маҳсулоти истеҳсолшуда ба 740 млн сомонӣ баробар гашт.
Тавре ба хабарнигори минтақавии АМИТ «Ховар» мудири шуъбаи энергетика ва саноати вилояти Суғд Озифхон Шарифзода иттилоъ дод, дар умум дар давоми 10 моҳи соли равон ҳаҷми истеҳсоли маҳсулоти саноатӣ 5,4 млрд. сомониро ташкил дод, ки он нисбат ба ҳамин давраи соли қаблӣ 1,7 млрд сомонӣ зиёд буда, бо нархҳои амалкунанда ба 145,3 фоиз ва бо назардошти индекси нархҳо ба 137,8 фоиз баробар мебошад.
Ҳамчунин аз оғози сол то инҷониб дар миқёси вилоят, дар натиҷаи тадбирҳои андешидашуда 82 корхонаи нав бо 2,4 ҳазор ҷойи корӣ ба фаъолият шурӯъ намуданд. Онҳо асосан корхонаҳои соҳаи саноати масолеҳи сохтмон, хӯрокворӣ ва сабукро дар бар гирифта, барои таъмини бозори дохилӣ бо маҳсулоти истеҳсоли ватанӣ ва воридотивазкунанда мусоидат намуданд.