«Суғдсинамо» дар Панҷакент «Тангно»-ро ба навор мегирад

Душанбе, 04.11.2016. /АМИТ «Ховар»/. Дар поёни сафари кории худ ба шаҳри Панҷакент муовини Сарвазири мамлакат Маҳмадтоир Зокирзода ва раиси вилоят Абдураҳмон Қодирӣ бо ҷараёни наворбардории филми нави Муассисаи давлатии «Суғдсинамо» шинос шуданд. Дар ин бора аз Мақомоти иҷроияи ҳокимияти давлатии вилояти Суғд ба АМИТ «Ховар» хабар доданд.
Абдураҳмон Қодирӣ ҷараёни сабтро мушоҳида намуда, бо коргардони ҷавон Муҳиддини Музаффар оид ба таҳияи филми нав суҳбат намуд. Айни замон дар ҷамоати Амондараи шаҳри Панҷакент аз ҷониби кормандони Муассисаи давлатии «Суғдсинамо» банаворгирии филми нав бо номи «Тангно» аз рӯи асари нависандаи шинохтаи тоҷик Сорбон идома дорад.
Ёдовар мешавем, ки чанде қабл филми дигари ин гурӯҳи эҷодӣ бо номи «Коса» дар фестивали кушоди байналмилалӣ дар Лондони Британияи Кабир ба гирифтани ҷоиза мушарраф гардид.