Суди ноҳияи Тоҷикобод нашъаҷаллобро ба муҳлати се солу шаш моҳ равонаи зиндон кард

Тоҷикобод, 11.11.2016. /АМИТ«Ховар»/. Суди ноҳияи Тоҷикобод Саъдуллоев Абдусонӣ Шамсуддиновичро, ки соли тавалудаш 1975, зодаи ноҳияи Тоҷикобод, оиладор, соҳиби ду фарзанд мебошад, дар содир намудани ҷиноят бо моддаҳои 21 қисми 1 ва 200 қисми 1 Кодекси ҷиноятии Ҷумҳурии Тоҷикистон гунаҳгор дониста ва бо дастрасии моддаи 68 қисми 1 КҶ Ҷумҳурии Тоҷикистон ҷазои адонагардида аз рӯи ҳукми пештара қисман зам карда шуда, ҷазои ниҳоӣ аз рӯи маҷмӯи ҳукмҳо ба муҳлати се солу шаш моҳ бо нигоҳ доштан дар муассисаи ислоҳии дорои низоми умумӣ таъйин кард.
Абдусонӣ Саъдуллоев пештар доғи судӣ доштааст, вале аз ин хулосаи даркорӣ набароварда, дар давоми муҳлати санҷишӣ даст ба ҷинояти бадқасдона задааст. Ҳангоми гузаронидани корҳои фавриву ҷустуҷӯӣ аз тарафи кормандони ШВКД дар ноҳияи Тоҷикобод аз дохили ҷевони айвони хонаи ӯ ҳангоми кофтуков ду порчаи полиэтилении рангашон зард ва сурх дарёфт гардид. Аз дохили порчаи полиэтилении рангаш сурх хокаю кулӯлаҳои рангашон сабзи ҷигарӣ ва аз дохили порчаи полиэтилении рангаш зард 74 баста маводи нашъаовари навъи ҳашиш дарёфт карда шуд.
Тибқи хулосаи ташхиси судии РТК ВКД-и Ҷумҳурии Тоҷикистон дар дохили бастаҳо 86 грамм маводи ҳашиш будааст.