«Туризм-омили муҳими иқтисоди миллӣ»: ҳафтаи муаррифии имконоти сайёҳии Тоҷикистон дар Олмон

Душанбе, 11.11.2016. /АМИТ «Ховар»/. Тоҷикистон ҳамчун кишвари сайёҳӣ тӯли ин рӯзҳо дар маркази диққати доираҳои дӯстдорони сайру саёҳати Олмон қарор дорад. Дар оғози ҳафтаи равон дар бинои Сафорати Тоҷикистон дар Берлин зери унвони «Туризм-омили муҳими иқтисоди миллӣ» бо иштироки намояндагони вазорату идораҳо ва парлумони Олмон, инчунин доираҳои фарҳангӣ, сайёҳӣ ва васоити ахбори оммаи ин кишвар барномаи илмию фарҳангӣ баргузор шуд.
Сафири Тоҷикистон дар Олмон Маликшо Неъматов ба иштирокчиён роҷеъ ба ҳадафҳои Ҳукумати Тоҷикистон, ки дар «Стратегияи миллии рушди Ҷумҳурии Тоҷикистон барои давраи то соли 2030» дарҷ гардидаанду бояд ба ҷалби доираҳои сармоягузорӣ ва сайёҳони кишвари иқомат ба Тоҷикистон мусоидат намоянд, иттилоъ дод.
Зимни чорабинӣ коршиносони масоили туризм, аз ҷумла муаллифи китоби «Роҳнамои Тоҷикистон» Дагмар Шрайбер ва Маттиас Пёшел, нуқтаи назари худро роҷеъ ба туризм ҳамчун омили муҳими иқтисоди кишвар арзёбӣ карданд, ки он метавонад ҳамчун сарчашмаи ғанисозии буҷаи миллӣ ва ҷойҳои нави корӣ хизмат кунад.
9 ноябр бо ибтикори Ассотсиатсияи экотуризми Тоҷикистон (PECTA) дар бузургтарин фурӯшгоҳи лавозимоти сайёҳии Олмон-«Globetrotter» дар шаҳри Берлин намоиши таблиғотӣ баргузор гардид.
Тибқи барномаи Ассосиатсияи экотуризми Тоҷикистон тӯли ҳафтаи равон дар шаҳрҳои Дрезден, Мюнхен, Штуттгарт, Ҳамбург ва Франкфурти лаби Майн чунин намоишҳо ба хотири ҷалби доираҳои дӯсторони сайру саёҳати Олмон ба Ҷумҳурии Тоҷикистон ба нақша гирифта шудаанд.