Журналисти тоҷик сазовори ҷоизаи махсуси «Комсомолская правда» гашт

Душанбе, 11.11.2016 /АМИТ «Ховар»/. Журналисти тоҷик, котиби масъули маҷаллаи «Илм ва ҳаёт» Насрулло Тўйчизода барои иштирок дар озмуни байналмилалии журналистии «Наслҳои ҷаҳон («Поколение мира») сазовори ҷоизаи махсуси нашрияи «Комсомольская правда» гардид. Бино ба гуфтаи Н. Тӯйчизода, ин ҷоиза ба се нафар хабарнигор- Анастасия Хатиашвили аз Гурҷистон, Елена Маркова аз Русия ва ба ӯ барои силсилаи мақолаҳо дар бораи иштирокчиёни Ҷанги дуюми ҷаҳон аз Тоҷикистон супорида шуд.
Озмуни мазкур аввали соли равон аз ҷониби Хазинаи байналмилалии «Русский мир» эълон шуда, ба он беш аз 130 кори журналистони давлатҳои гуногун пешниҳод гардиданд. Нашрияи «Комсомолская правда» тасмим гирифт, дар қатори муассисон, барои се хабарнигор ҷоизаи махсуси худро таъсис диҳад.
Ҷоиза дар доираи баргузории Ассамблеяи 10-умини Хазинаи «Русский мир» дар шаҳри Маскав аз ҷониби роҳбари Департаменти ҳуқуқи муаллифӣ ва лоиҳаҳои байналмилалии ҶС «Хонаи ноширони Комсомольская правда» Татяна Митюсова ба хабарнигори тоҷик Насрулло Тўйчизода супорида шуд.
Т. Митюсова иброз дошт, ки аз байни маводи зиёди эҷодии журналистон навиштаи ин се журналист бо нигоҳи тоза дар ҷодаи журналистӣ ва тарзи баёни худ фарқ мекарданд.