Ҷамъбасти фаъолияти вазорату идораҳо дар самти пешгирии ҳолатҳои фавқулода

ДУШАНБЕ, 22.12.2016 /АМИТ «Ховар»/. Кормандони  Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон барои намояндагони вазорату идораҳои масъул ба масъалаҳои ҳолатҳои фавқулода ва мудофиаи гражданӣ дар Кумитаи давлатии сармоягузорӣ ва идораи амволи давлатии  Ҷумҳурии Тоҷикистон семинар баргузор карданд.
Тавре ки аз хадамоти матбуоти КҲФ хабар доданд, «дар ҷараёни семинар ҷараёни иҷрои Қарори Ҳукумати Ҷумҳурии Тоҷикистон аз 31 декабри соли 2014 «Дар бораи сохтор ва тартиби фаъолияти Низоми ягонаи давлатии ҶТ оид ба пешгирӣ ва рафъи ҳолатҳои фавқулода»-ро баррасӣ намуданд».
Дар семинар ҳамчунин фаъолияти вазорату идораҳо дар 11 моҳи соли ҷорӣ дар самти пешгирии ҳолатҳои фавқулода ва корҳо дар иртибот ба мудофиаи гражданӣ ҷамъбаст шуданд.
«Ҳадафи аслии роҳандозии ин гуна чорабиниҳо такмили малакаҳои ҳосилшуда дар самти мудофиаи гражданӣ миёни кормандони вазорату идораҳои дахлдор, ҳамчунин омодагӣ ба зуҳури ҳар гуна ҳолатҳои фавқулода мебошад»,-хабар дод манбаъ.
Зимни семинар инчунин камбудиҳо зикр ва муҳлати бартараф намудани онҳо муайян карда шуд. Ҳамчунин бо мақсади татбиқи самараноки минбаъдаи Қарор баргузории чандин чорабинӣ дар соли оянда тарҳрезӣ гардид.