Ба кормандони БМТ лоиҳаи Корпоратсияи молиявии байналхалқӣ (IFC) муаррифӣ гардид

ДУШАНБЕ, 07.11.2016 /АМИТ «Ховар»/. Лоиҳаи Корпоратсияи молиявии байналхалқӣ (IFC) оид ба таҳкими инфрасохтори молиявӣ дар Озарбойҷон ва кишварҳои Осиёи Марказӣ дар чаҳорчӯбаи омӯзиши натиҷаҳои таъсири низоми мубодилаи маълумоти қарзӣ ба бахши молиявии мамлакат ва баррасии имкониятҳои ба роҳ мондани тадқиқоти муштарак ба кормандони Бонки миллии Тоҷикистон (БМТ) муаррифӣ гардид. Дар ин бора аз БМТ хабар доданд.
Заррина Одинаева, менеҷери лоиҳаи Корпоратсияи молиявии байналхалқӣ дар ҷараёни муаррифии лоиҳа иброз дошт, ки «мақсади тадқиқот муайян ва таҳлил кардани таъсири иҷтимоӣ ва иқтисодии низоми мубодилаи маълумоти қарзии бюроҳои хусусӣ, бахусус таъсири онҳо ба ҳамгироии молиявӣ ва сифати сандуқи қарзӣ, таҳкими устуворӣ ва кам кардани хавфҳо дар бахши молиявӣ, ҳамчунин баланд кардани сатҳи дастрасии бахши хусусӣ ба маблағгузорӣ мебошад».
«Тадқиқоти мазкур дар сатҳи кишварҳо аввалин тадқиқоте хоҳад буд, ки бо мақсади муаяйн намудан ва дар асоси ҷамъоварию таҳлили маълумоти аниқ додани баҳои шуморавӣ ба тағйироту ислоҳотро то ва баъди татбиқи низоми мубодилаи маълумоти қарзӣ муқоиса менамояд»,- зикр гардид зимни мулоқоти корӣ.
Дар мулоқоти намояндагони Корпоратсияи молиявии байналхалқии гурӯҳи Бонки ҷаҳонӣ бо кормандони бонк муовини якуми Раиси Бонки миллии Тоҷикистон Ҷамолиддин Нуралиев оид ба паҳлӯҳои мухталифи муаррифии лоиҳаи пешниҳодгашта мулоҳизаҳои худро иброз дошт.