Баррасии ҳамкории Тоҷикистон бо созмонҳои бонуфузи иқтисодии Франсия

ДУШАНБЕ, 08.12.2016. /АМИТ «Ховар»/. Ҳамкорӣ байни Тоҷикистон ва Созмони ҳамкории иқтисодӣ ва рушд, аз ҷумла дар бахшҳои иқтисод, пешбурди фаъолияти соҳибкорӣ ва бонкдорӣ, андозсупорӣ ва молия, инчунин ҳифзи муҳити зист масоиле буданд, ки муовини Вазири корҳои хориҷии Тоҷикистон Музаффар Ҳусейнзода ва роҳбарияти СҲИР 7 декабр дар Париж мавриди баррасӣ қарор доданд. Дар ин бора ба АМИТ «Ховар» аз Сафорати Ҷумҳурии Тоҷикистон дар Франсия хабар доданд.
«Ҷонибҳо ҳавасмандиро барои густариши робитаҳо дар самтҳои мавриди эҳтимоми тарафайн баён намуданд», — гуфта мешавад дар иттилоияи Сафорати Тоҷикистон дар Париж.
Ҳамчунин дар иттилоия омадааст, ки худи ҳамон рӯз муовини Вазири корҳои хориҷӣ Музаффар Ҳусейнзода бо роҳбарияти Ассотсиатсияи соҳибкорони Франсия (МЕДЕФ) ва ҳамраиси бахши франсавии Шӯрои соҳибкории Тоҷикистону Франсия Кристоф Фонтен мулоқот анҷом дод.
«Ҷонибҳо зимни мулоқот ҷанбаҳои гуногуни ҳамкории иқтисодию тиҷоратии байни Тоҷикистон ва Франсияро, хусусан дар бахши соҳибкории хурд ва миёна баррасӣ намуданд. Саҳми Шӯрои соҳибкорӣ дар пешбурди ҳамкорӣ муҳим арзёбӣ гардид», — зикр шудааст дар иттилоияи Сафорати Тоҷикистон дар Париж.