Баррасии масъалаи тақлидкории занону духтарон ба фарҳанги бегона

ДУШАНБЕ, 24.12.2016. /АМИТ «Ховар»/. Бахши кор бо занон ва оилаи мақомоти иҷроияи ҳокимияти давлатии ноҳияи Данғара дар деҳаи Ғарғараи Ҷамоати деҳоти Корез ва дар деҳаи Хоҷа Шақиқи Балхии Ҷамоати деҳоти Себистон бо иштироки занону духтарон ва раисони маҳалла ҳамоиш доир намуд.
Дар ин бора аз хадамоти матбуоти вилояти Хатлон хабар доданд.
Бино ба иттилои манбаъ, дар ҳамоиш масъалаи пешгирии омилҳои номатлуб дар байни занону ҷавонон, ноболиғон аз қабили содир намудани ҷиноят, нашъамандӣ, нашъаҷаллобӣ, худкушию худсӯзӣ, шомилшавии занону духтарон ва ҷавонон ба ҳар гуна ҳизбу ҳаракатҳо ифротӣ, тақлидкории занону духтарон ба фарҳанги бегона, ҷудошавии оилаҳо баррасӣ гаштанд.
Мутахассисон инчунин муҳтавои Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд»-ро ба иштирокчиён манидод намуданд.
Инчунин дар кохи фарҳанги ноҳияи Хуросон дар якҷоягӣ бо намояндагони мақомоти ҳифзи ҳуқуқ, бахшҳои дин, танзими анъана ва ҷашну маросимҳои миллӣ, ҷавонон, варзиш ва сайёҳии ноҳия оид ба моҳияти қонунҳои амалкунандаи Ҷумҳурии Тоҷикистон ва ҷиҳати пешгирии роҳи ҳама гуна зуҳуроти зӯроварӣ, пешгирии шомилшавии ҷавонон, занону бонувон ба ҳизбу ҳаракатҳои тундгаро, содиршавии ҷиноят ва ҳодисаҳои номатлуб, тақлид ба фарҳанги бегона, нашъамандию нашъаҷаллобӣ, ҷудошавии оилаҳо, баланд бардоштани маърифати ҳуқуқӣ ва маънавии шаҳрвандон, махсусан занону духтарон бо иштироки аҳли ҷамоатчигӣ вохӯрӣ доир гашт.