Дар Хатлон марҳилаи дуюми сохтмони роҳҳои дохилишаҳрии Қӯрғонтеппа ва Кӯлоб оғоз гардид

ҚӮРҒОНТЕППА, 19.12.2016 /АМИТ «Ховар»/. Имрӯз дар шаҳри Қӯрғонтеппа ҷамъбасти марҳилаи аввал ва оғози марҳилаи дуюми сохтмони роҳҳои дохилии мошингарди шаҳрҳои Қӯрғонтеппа-Кӯлоб оғоз гардид. Дар ин бора хабарнигори минтақавии АМИТ «Ховар» хабар дод.
«Раиси вилояти Хатлон Давлатшоҳ Гулмаҳмадзода зикр кард, ки сохтмони роҳҳо яке аз самтҳои асосӣ ба ҳисоб рафта, Асосгузори сулҳу ваҳдати миллӣ, Пешвои миллат Президенти Ҷумҳурии Тоҷикистон муҳтарам Эмомалӣ Раҳмон ин масъаларо ҳамеша таҳти назорати худ қарор додаанд. Дар доираи марҳилаи якуми корҳои сохтмонӣ 6,2 км роҳҳои шаҳри Қӯрғонтеппа ва 5,8 км роҳҳои шаҳри Кӯлоб таъмир ва таҷдид мегарданд. Дар марҳилаи дуюм дар назар аст 8,9 км роҳҳои шаҳри Қӯрғонтеппа ва 11,3 км роҳҳои шаҳри Кӯлоб аз таъмир ва таҷдид бароварда шаванд»,-хабар дод манбаъ.
Маблағи корҳои сохтмонӣ аз тарафи Ҷумҳурии Мардумии Чин дар ҳамкорӣ бо Ҳукумати Ҷумҳурии Тоҷикистон ҷудо шуда, пудратчии лоиҳа ширкати «China Road» ба ҳисоб меравад.