Дар Китобхонаи миллӣ конфронси байналмилалии «Самаранокии идоракунии молияи давлатӣ ва аҳамияти он дар рушди устувори иқтисодиёти миллӣ» оғоз шуд

Душанбе, 01.12.2016. /АМИТ «Ховар»/. Дар Китобхонаи миллии Тоҷикистон конфронси илмию амалии байналмилалӣ дар мавзӯи «Самаранокии идоракунии молияи давлатӣ ва аҳамияти он дар рушди устувори иқтисодиёти миллии Тоҷикистон» ҷараён дорад. Дар ин бора хабарнигори АМИТ «Ховар» хабар медиҳад.
Дар конфронси мазкур Ашӯрбой Солеҳзода, ректори Донишкадаи молия ва иқтисоди Тоҷикистон, Ҷамшед Нурмуҳаммадиён, муовини вазири молияи Ҷумҳурии Тоҷикистон, Раҳматулло Мирбобоев, муовини якуми вазири маориф ва илми Ҷумҳурии Тоҷикистон, Ясмин Гуедар, Сафири Фавқулода ва Мухтори Фаронса дар Тоҷикистон ва дигар меҳмонон аз Русияву Қазоқистон иштирок карда, сухан гуфтанд.
«Мақсад аз баргузории конфронс муаррифии тадқиқоти илмии олимон ва муҳаққиқон ҳамчун натиҷаи пурсамари ҳамкории бисёрсамта байни Донишкадаи молия ва иқтисоди Тоҷикистон ва Лоиҳаи Иттиҳоди Аврупо дар самти идоракунии молияи давлатӣ ва омодасозии мутахассисони ҷавобгӯ ба бозори меҳнати ҷаҳонӣ мебошад»,- иброз дошт Ашурбой Солеҳзода дар оғози конфронс.
Конфронс бо дастгирии Лоиҳаи Иттиҳоди Аврупо оид ба дастгирии самтҳои интихобшудаи ислоҳоти идоракунии молияи давлатӣ (ИМД), Лот 1 ҷараён дорад.
Кори конфронси илмию амалии байналмилалӣ пагоҳ низ идома меёбад.