Имрӯз дар Маркази матбуоти АМИТ «Ховар» «Нақши матбуоти соҳавӣ дар замони истиқлол»-ро баррасӣ мекунанд

ДУШАНБЕ, 08.12.2016 /АМИТ «Ховар»/. Имрӯз соати 14.00 дар Маркази матбуоти АМИТ «Ховар» дар доираи омодагиҳо ба таҷлили 90-солагии маҷаллаи «Маърифати омӯзгор» дар мавзӯи «Нақши матбуоти соҳавӣ дар замони истиқлол» конфронси ҷумҳуриявӣ баргузор мегардад.
Тавре хабарнигори АМИТ «Ховар» иттилоъ медиҳад, дар назар аст, ки дар конфронси мазкур Абдуҷаббор Раҳмонзода, Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа, Нуриддин Саид, Вазири маориф ва илми Ҷумҳурии Тоҷикистон ва Зиннатулло Исмоилзода, Раиси Иттифоқи журналистони Тоҷикистон сухан гӯянд.
«Инчунин устодони Донишгоҳи миллии Тоҷикистон Мурод Муродӣ дар мавзӯъҳои «Нақши матбуоти соҳавӣ дар замони истиқлол», Баҳриддин Камолиддинов дар мавзӯи «Муносибат ба забон дар матбуоти соҳавӣ» ва Аъламхон Кӯчаров «Рӯнамоии китоби «Пайкари афкор»-и Саида Набиева» маърӯза мекунанд»,-хабар дод манбаъ.