Қочоқчӣ бо тахаллуси «Нури Қарағоч» боздошт гардид

ДУШАНБЕ, 21.12.2016 /АМИТ «Ховар»/. Кормандони Агентии назорати маводи нашъаовари назди Президенти Ҷумҳурии Тоҷикистон дар ҳудуди шаҳри Душанбе мошини тамғаи «Опел-Астра»-ро, ки онро истиқоматкунандаи шаҳри Кобул, шаҳрванди 30-солаи Ҷумҳурии Исломии Афғонистон Сиддиқи Муҳаммад Зирак идора мекард, боздошт намуданд. Дар ин бора аз Агентии назорати маводи нашъаовари назди Президенти Ҷумҳурии Тоҷикистон ба хабарнигори АМИТ «Ховар» хабар доданд.
«Ҳангоми кофтуков аз дохили мошин 7 халтаи полиэтиленӣ, ки дар дохилашон 203 баста маводи ҳашиш буд, ошкор ва мусодира гардид. Вазни маводи мусодиргардида 208 кг- ро ташкил дод.
Ҳамчунин бо гумони даст доштан дар ҷинояти мазкур ҳаммаслаки ӯ — сокини 48-солаи пойтахт Нуралӣ Бобоев бо тахаллуси «Нури Қарағоч» боздошт гардид. Тафтишоти пешакӣ муайян намуд, ки боздоштшуда мошини худро ба шаҳрванди Афғонистон бо мақсади дастрас намудани маводи нашъаовар додааст»,-илова намуд манбаъ.
Тавре маълум гардид, гурӯҳи қочоқбарон муддати дароз ба интиқоли ғайриқонунии маводи нашъаовар машғул буда, интиқоли онро аз ҳудуди Афғонистон ба қаламрави Тоҷикистон ва аз Тоҷикистон ба кишварҳои Осиёи Марказӣ ва Федератсияи Россия ба роҳ монда буданд.
Дар айни ҳол тадбирҳои зарурӣ барои муайян ва боздошт намудани аъзои боқимондаи ин гурӯҳи муташаккил андешида шуда истодаанд.