Татбиқи Даҳсолаи «Об барои рушди устувор»: «Сокинони ҷамоати деҳоти Чилдухтарони ноҳияи Мӯъминобод соли 2017 чашмаҳои хушкгардидаро аз нав тоза мекунанд

КӮЛОБ, 31.12.2016 /АМИТ «Ховар»/. Бо ташаббуси Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Даҳсолаи байналмилалии амал «Об барои рушди устувор» барои солҳои 2018-2028 пешниҳод шуд. Боиси сарфарозии мост, ки онро Маҷмааи умумии Созмони Милали Муттаҳид бо қатъномаи худ қабул кард. Қабули қатъномаи мазкур дар ҳоле, ки оқибатҳои хатарноки ивазшавии иқлим, хушкшавӣ ё биёбоншаӣ дар баъзе аз минтақаҳои ҷаҳон, обхезиҳои шадид ва дигар офатҳои табиӣ, дастрасӣ ба об, паҳн шудани бемориҳои сирояткунанда ба воситаи ифлос шудани он ва дигар масоили ба он марбут ҷомеаи ҷаҳониро ба ташвиш овардааст, саривақтӣ буда, аҳамияти умумибашарӣ дорад.

Бо дарки ин масъала сокинони ҷамоъати деҳоти Чилдухтарони ноҳияи Мӯъминобод мақсад доранд дар соли 2017 чашмаҳои хушкгардидаро аз нав тоза намоянд ва дастрасии сокинонро ба оби тозаи ошомиданӣ таъмин созанд.