Ваҳдат-падидаи нодири даврони Истиқлолият

ДУШАНБЕ, 13.12.2016 /АМИТ «Ховар»/. Дар Донишгоҳи давлатии Хуҷанд ба номи академик Бобоҷон Ғафуров маҳфили «Адибони ваҳдатсаро» таҳти унвони «Ваҳдат-падидаи нодири даврони Истиқлолият» баргузор гардид.
Тавре аз Донишгоҳи давлатии Хуҷанд хабар доданд, дар он шоирону нависандагон, рӯзноманигорон, устодони собиқадор ва донишҷӯён иштирок намуданд.
«Барои расидан ба Ваҳдати миллии тоҷикон Сарвари давлат Эмомалӣ Раҳмон бо мухолифини Ҳукумат чандин музокираҳо баргузор намуд ва дар натиҷа мо ба ин неъмати бебаҳо ноил гардидем. Ин буд, ки бо дастгирии бевоситаи халқи хирадманд ва дурандеши тоҷик Эмомалӣ Раҳмон Асосгузори сулҳу ваҳдати миллӣ ва Пешвои миллат эътироф гардиданд»,- хабар дод манбаъ.
Дар маҳфил шоири шинохтаи тоҷик Озарахш асоси расидан ба Ваҳдатро доштани муҳаббат нисбат ба Ватан арзёбӣ намуда, ба ин маънӣ аз ашъори хеш чанд шеъри тозаи ватанпарварона қироат намуд.