Ёвон: Ташаббуси инсонпарваронаи Сарвари давлат мояи ифтихор аст!

ЁВОН, 30.12.2016 /АМИТ «Ховар»/. Дирӯз дар Коллеҷи тиббии ноҳияи Ёвон бо иштироки устодону донишҷӯён бахшида ба Даҳсолаи байналмилалии амал «Об барои рушди устувор», солҳои 2018-2028 ҷамъомад доир гардид. Дар ин бора ба хабарнигори АМИТ «Ховар» муовини директори Коллеҷи тиббии ноҳия Хусрав Бобобеков иттилоъ дод.
Мақсади ҷамъомад- ин бохабар гардидани донишҷӯёни муассиса аз ҳадафҳои асосии сиёсати хориҷии Ҷумҳурии Тоҷикистон ва ҳифзи манфиатҳои миллӣ дар арсаи байналмилалӣ, фароҳам овардани шароити мусоиди берунӣ барои рушди устувори мамлакат ва мусоидат ба таҳкими пояҳои истиқлолу соҳибихтиёрии давлати Тоҷикистон мебошад.
«Ташаккул ва татбиқи сиёсати хориҷӣ, ки меҳвари онро сиёсати «дарҳои кушода» ташкил медиҳад, яке аз дастовардҳои бузурги давлати миллии мо дар замони соҳибистиқлолӣ ба шумор меравад. Дар ин давра Тоҷикистони мо дар арсаи байналмилалӣ мавқеи шоистаи худро пайдо намуда, муносибат ва ҳамкории гуногунҷанбаро бо кишварҳои дунё, созмонҳои байналмилаливу минтақавӣ ва ниҳодҳои байналмилалии молиявӣ ба роҳ монд»,-иброз дошт донишҷӯи курси чоруми муассисаи мазкур Нигораи Умарбек.
Ёдовар мешавем, ки бо ташаббуси Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Даҳсолаи нави байналмилалии «Об барои рушди устувор» аз ҷониби Созмони Миллали Муттаҳид бо қабули қатънома дастгирӣ ёфт. Ин ташаббуси инсонпарварона барои ҳар як тоҷикистонӣ мояи ифтихор аст.