Фаъолияти илмии Замира Fаффорова дар маҷаллаи «Қанди порсӣ» дар Ҳиндустон ба нашр расид

ДУШАНБЕ, 4.01.2017 /АМИТ «Ховар»/. Як шумораи махсуси маҷаллаи «Қанди порсӣ», ки аз ҷониби Маркази таҳқиқоти форсии ройзании Ҷумҳурии Исломии Эрон дар шаҳри Деҳлии Ҳиндустон ба нашр мерасад, пурра ба фаъолияти илмии доктори илмҳои филологӣ, профессори Донишгоҳи давлатии Хуҷанд Замира Fаффорова бахшида шудааст.
Аз Донишгоҳи давлатии Хуҷанд ба АМИТ «Ховар» иттилоъ доданд, ки шумораи махсуси маҷаллаи «Қанди порсӣ» (шумораи №71-72-юми соли 2016) бо номи «Вижаномаи профессор Замира Fаффорова» 22 мақолаи илмии профессор, аз ҷумла «Нуфузи Ҷомӣ дар Шибҳи қораи Ҳинд», «Назаре ба ҳаёти илмӣ-адабии Ҳиндустон дар замони Лудиён», «Арзиш ва аҳамияти ахлоқии насиҳатномаҳои Амир Хусрави Деҳлавӣ» «Нигоҳе ба мӯҳтавиёт ва вижагиҳои сабкии маснавии «Меҳру Моҳ»-и Ҷамолии Деҳлавӣ», «Нусхашиносии «Сияр-ул-орифин»-и Ҷамолии Деҳлавӣ ва шарҳи нусхае аз он дар Китобхонаи Берлин», «Ривоҷи забони форсӣ дар Кашмир дар қуруни чаҳордаҳум ва понздаҳум», «Вижагиҳои сабки ҳиндӣ дар ашъори шуарои Кашмир», «Шоири рангиннаво» ва «Шинохти Камоли Хуҷандӣ дар Ҳинду Покистон»-ро дар ҳаҷми 505 саҳифа дар бар гирифта, ба хатти форсӣ манзури хонандагон гардонид.
Маҷаллаи «Қанди порсӣ» қариб чил сол мешавад, ки дар шаҳри Деҳлии Ҳиндустон ба нашр мерасад ва дар тӯли ин фосила танҳо якчанд шумораи он ба фаъолияти илмии адабиётшиносони фарҳехта, ки бо таҳқиқи адабиёти форсизабони Ҳинд машғул ҳастанд, бахшида шудааст.
Бояд зикр намуд, ки Замира Ғаффорова аз зумраи олимони сермаҳсул буда, дар миёни адабиётшиносони дохил ва хориҷи кишвар маъруфият дорад.