«Манчестер Сити» омода аст Мессиро харидорӣ кунад

ДУШАНБЕ, 19.01.2017/АМИТ «Ховар»/. Клуби футболи «Манчестер Сити»-и Англия омода аст барои харидани ҳамлагари дастаи мунтахаби Аргентина ва КФ «Барселона» Леонел Месси 115 миллион евро ҷудо намояд. Дар ин бора « The Sun » хабар медиҳад.
То ҳол «Манчестер Сити» расман чунин пешниҳод накардааст, аммо зимни гуфтушунид барои ин бозингари 29-солаи аргентинагӣ ин рақамҳо пешниҳод шудаанд.
Агар ин нақша амалӣ гардад, пас дар таърихи футболи ҷаҳон трансфери аз ҳама гаронтарин ба қайд гирифта хоҳад шуд. Тобистони соли гузашта нимҳимоятгари фаронсавии «Ювентус» Пол Погба ба маблағи 105 миллион евро ба дастаи «Манчестер Сити» гузашт ва рекорди гаронтаринро ба номи худ мӯҳр зад.
Месси дар ҳайати дастаи «Барселона» 8 маротиба соҳиби унвони чемпионӣ ва 4 карат барандаи ҷоми ин кишвар гардида, 4 дафъа бо «Барселона» ҳамчун қаҳрамони Лигаи чемпионҳои Аврупо шинохта шуд. Ӯ дар мавсими соли равон дар 24 бозии «Барселона» иштирок карда, 27 гол задааст ва ҳаммуаллифи 9 голи дигар мебошад.