Неъматулло Ҳикматуллозода: «51 лоиҳаи санадҳои меъёрии ҳуқуқӣ таҳия ва барои баррасӣ пешниҳод гардиданд»

ДУШАНБЕ, 31.01.2017 /АМИТ «Ховар»/. Дар соли 2016 аз ҷониби Вазорати рушди иқтисод ва савдои Ҷумҳурии Тоҷикистон 51 лоиҳаи санадҳои меъёрии ҳуқуқӣ таҳия ва барои баррасӣ пешниҳод карда шуданд. 31 лоиҳаи он қабул гардида, 9 лоиҳа дар баррасии Ҳукумати Ҷумҳуии Тоҷикистон, Маҷлиси намояндагони Маҷлиси олии Ҷумҳурии Тоҷикистон ва 11 лоиҳа дар баррасии вазорату идораҳои дахлдор қарор доранд. Дар ин бора Неъматулло Ҳикматуллозода, Вазири рушди иқтисод ва савдои Ҷумҳурии Тоҷикистон зимни нишасти матбуотӣ ба хабарнигорон иттилоъ дод.
«Ҳамзамон аз ҷониби Вазорат нишондиҳандаҳои рушди иқтисодию иҷтимоии ҷумҳурӣ барои соли 2017 ва параметрҳои асосии он барои солҳои 2018-2019 муайян карда шуда, тавсияҳои методӣ ба вазорату идораҳо, корхонаҳо ва мақомоти иҷроияи маҳаллии ҳокимияти давлатӣ пешниҳод гардиданд»,-гуфт Неъматулло Ҳикматуллозода.