Охирин бозии санҷишии «Истиқлол» бо «Ҳосилот»- и Фархор пеш аз сафар ба Туркия
ДУШАНБЕ, 16.01.2017/АМИТ «Ховар»/. Чемпиони Тоҷикистон «Истиқлол»-и Душанбе бозии охирини худро пеш аз сафар ба Туркия бо «Ҳосилот»-Фархор дар Варзишгоҳи марказии ҷумҳуриявӣ барпо намуд. Вохӯрӣ бо натиҷаи 3:2 бо ғолибияти чемпионҳо хотима ёфт.
«Истиқлол»-и Душанбе ва «Ҳосилот»-и Фархор, ки тайёрии худро ба бозиҳои Ҷоми Конфедератсияи футболи Осиё (КФО) идома медиҳанд, дирӯз бо як бозии таҷрибавию санҷишӣ хотири мухлисонашонро шод карданд. Аз оғоз бозии ин дастаҳо ниҳоят ҷолибу шавқовар сурат гирифт. Легионери ӯзбекистонии дастаи «Ҳосилот»-Сайриддин Ғаффоров тавонист дар дақиқаи 7-ум ҳисобро боз кунад. Беҳтарин бозингари соли гузаштаи кишварамон Манучеҳр Ҷалилов 10 дақиқа пеш аз анҷоми нимаи аввал натиҷаро баробар кард. Дмитрий Баркови рус, ки аз назари мураббиёни «Истиқлол» мегузарад, дар дақиқаи 50-ум соҳибони майдонро ба сафи пеш баровард. Ин голи сеюми Барков дар ду бозии охири санҷишии «Истиқлол» ба шумор меравад. Ҷаҳонгир Алиев муаллифи голи сеюми «Истиқлол» ва Хайрулло Азизов муаллифи тӯби дуюми «Ҳосилот» гардиданд.
Ин охирин бозии санҷишии «Истиқлол» пеш аз сафар ба шаҳри Анталияи Туркия мебошад, ки даста марҳилаи навбатии омодагиро таҳти роҳбарии Мӯҳсин Муҳаммадиев дар он ҷо барпо мекунад.
Ёдовар мешавем, ки «Истиқлол» ва «Ҳосилот» имсол шарафи Тоҷикистонро дар бозиҳои Ҷоми КФО ҳимоя мекунанд.
Бозии санҷишӣ. Варзишгоҳи марказии ҷумҳуриявӣ. 600 тамошобин.
«Истиқлол» — «Ҳосилот» 3:2
Муаллифи голҳо: Сайриддин Ғаффоров, 7 (0:1). Манучеҳр Ҷалилов, 34 (1:1). Дмитрий Барков, 50 (2:1). Ҷаҳонгир Алиев, 62 (3:1). Хайрулло Азизов, 83 (3:2).
Ҳайати дастаҳо:
«Истиқлол» (Душанбе): Қурбоналӣ Бобоев (Рустам Ятимов, 46), Дэвид Мавутор, Амирбек Ҷӯрабоев, Соҳиб Саванқулов (Фаридун Шарипов, 26), Сиёвуш Асроров (Алишер Сафаров, 86), Аҳтам Назаров (Табрези Давлатмир, 46), Фатҳулло Фатҳуллоев (Ромиш Ҷалилов, 70), Ҷаҳонгир Алиев, Александр Кулинитс (Дилшод Восиев, 46), Манучеҳр Ҷалилов (Сӯҳроб Ҷалилов, 72), Дмитрий Барков.
«Ҳосилот» (Фархор): Фатҳулло Бобоев, Ҳасан Рустамов, Сафаралӣ Каримов, Ойбек Абдуғаффоров, Мӯсо Содиқ, Акуффо Гершон (Абдурасул Раҳмонов, 62), Сайриддин Ғаффоров (Хайрулло Азизов, 70), Иброҳим Рабимов, Муҳаммадҷони Ҳасан, Агблей Ҷонс (Саидалии Сафаралӣ, 80), Шодибек Ғаффоров (Абдусамад Хоҷибоев, 57).
Огоҳӣ гирифтанд: Саидалии Сафаралӣ, Сайриддин Ғаффоров («Ҳосилот»).
Аз майдон ронда шуд (бо ивазшавӣ): Сиёвуш Асроров («Истиқлол»), 86, корти 2-юми зард.
Довари майдон: Насрулло Кабиров (Норак).








Дар Хуҷанд чемпионати ҷумҳуриявӣ оид ба шиноварӣ ҷамъбаст гардид
«PANDA CUP 2026». Дастаи мунтахаби ҷавонони Тоҷикистон (U-20) бо дастаи Чин мусовӣ бозӣ кард
Дастаи мунтахаби Тоҷикистон оид ба футбол ба финали Кing’s Сup 2026» баромад
Аъзои дастаи мунтахаби наврасони Тоҷикистон (U-17) бар ҳамсолонашон аз Фиҷи пирӯз шуданд
«KING’S CUP 2026». Имрӯз дастаи мунтахаби Тоҷикистон дар даври нимниҳоии мусобиқа бо тими яккачини Умон бозӣ мекунад
Дастаи мунтахаби Тоҷикистон оид ба футзал бозии дӯстонаи дуюмро бо Узбекистон мусовӣ анҷом дод
Дастаи мунтахаби ҷавонони Тоҷикистон (U-20) дар оғози Мусобиқаи «Рanda Сup-2026» бо Кореяи Ҷанубӣ ҳисоби бозиро мусовӣ кард
Дастаи мунтахаби Тоҷикистон омодагӣ ба мусобиқаи «Кing’s Сup 2026»-ро оғоз кард
Паҳлавонони тоҷик аз Чемпионати ҷаҳон оид ба самбо бо шаш медали ифтихорӣ бармегарданд
Дастаи мунтахаби наврасони Тоҷикистон (U-17) бо дастаи Кот-д’Ивуар мусовӣ бозӣ намуд
Президенти Кумитаи миллии паралимпии Тоҷикистон дар ҷаласаи Кумитаи байналмилалии паралимпӣ иштирок намуд
Дастаи мунтахаби футзали Тоҷикистон бозии дӯстонаи якумро бо дастаи Узбекистон анҷом дод






