Шоми мусиқии Фирӯз Баҳор дар Берлин

ДУШАНБЕ, 24.01.2017. /АМИТ «Ховар»/. 22 январ дар виллаи Швартсшеи Берлин шоми мусиқии бастакори овозадори тоҷик Фирӯз Баҳор баргузор гардид.
Тавре аз Сафорати Ҷумҳурии Тоҷикистон дар Олмон хабар доданд, барномаи мазкур дар феҳристи барномаҳои фарҳангии шаҳри Берлин дохил гардида, барои шунидани оҳангҳои ин бастакори шинохта меҳмонон ва сокинони пойтахти Олмон- шаҳри Берлин, аъзои Ҷамъияти дӯстии Тоҷикистону Олмон, ҳамватанони бурунмарзӣ ва аҳли фарҳанг ҷамъ омаданд.
Бастакор Фирӯз Баҳор дар оғози барнома оид ба фаъолият ва эҷодиёти худ, оҳангҳои офаридааш ба иштирокчиён маълумот дода, бо ифтихори баланд аз фарҳангу мусиқии тоҷик ба ҳозирин нақлҳои хотирмон кард. Дар барномаи мусиқӣ Фирӯз Баҳор, аз ҷумла офаридаҳои худ «Мақоми Ироқ», «Суруди баҳор» ва «Мароканд», инчунин аз эҷодиёти бастакорони машҳури олам асарҳо иҷро намуда, хотири ҳозиринро шод намуд.
Дар анҷоми шоми мусиқӣ Сафири Фавқулода ва Мухтори Ҷумҳурии Тоҷикистон дар Олмон Маликшо Неъматов ба устод Фирӯз Баҳор барои ин шоми хотирмон изҳори миннатдорӣ намуд.