Соли 2016 дар Қӯшунҳои сарҳадии КДАМ 7 дидбонгоҳи нави замонавӣ мавриди истифода қарор гирифт

ДУШАНБЕ, 3.01.2017 /АМИТ «Ховар»/. Дар соли 2016 дар Қӯшунҳои сарҳадии Кумитаи давлатии амнияти миллии Ҷумҳурии Тоҷикистон 7 дидбонгоҳи нави замонавии бо таҷҳизоти муосир муҷаҳҳаз барои афсарону сарбозон ба истифода дода шуданд.
Дар ин бора дар ҷаласаи ҷамъбастии фаъолияти хизматӣ-ҷангии Қӯшунҳои сарҳадии КДАМ ҶТ дар соли 2016 гуфта шуд.
Зикр гардид, ки сохтмони дидбонгоҳҳои сарҳадӣ бо дастгирии Пешвои миллат, Сарфармондеҳи Олии Қувваҳои Мусаллаҳ Президенти Ҷумҳурии Тоҷикистон Эмомалӣ Раҳмон аз тарафи Дирексияи сохтмони иншооти ҳукуматии Дастгоҳи иҷроияи Президенти Ҷумҳурии Тоҷикистон сохта шуда, дорои ҳамаи шароит ва утоқҳои муосири замонавӣ барои фаъолияти сарҳадбонон мебошад.
Дар ҷаласа ҳамкории судманди ҳарбию техникӣ миёни Ҷумҳурии Тоҷикистон ва Иёлоти Муттаҳидаи Амрико таъкид гардида, зикр шуд, ки дар чаҳорчӯбаи ҳамкорӣ барои мустаҳкам намудани сарҳади давлатии Ҷумҳурии Тоҷикистон аз ҷониби созмонҳои байналхалқӣ оид ба сохтмон, омӯзиш ва кумаки моддӣ-техникие, ки ба Қӯшунҳои сарҳадӣ пешкаш гардид, дар маҷмӯъ 15 000 000 доллари амрикоӣ масраф шудааст.
Дар ин давра Қӯшунҳои сарҳадӣ бо 59 адад нақлиёти гуногунтамға, 286 маҷмӯъ лавозимоти зарурӣ барои сарҳадбонон, 930 маҷмӯъ воситаи алоқа ва дигар ашъёҳои зарурии хизматӣ-ҳарбӣ таъмин гардиданд, ки онҳо бевосита аз ҷониби Ҳукумати ИМА тақдим гардиданд.