«Ҷавонон-пайрави Пешвои миллат» — роҳпаймоии ҷавонон дар Файзобод

ФАЙЗОБОД, 08.02.2017. /АМИТ «Ховар»/. Бахшида ба Соли ҷавонон эълон гардидани соли 2017 дар маркази ноҳияи Файзобод бо иштироки зиёда аз 500 нафар ҷавонони ҷамоатҳои шаҳраку деҳоти ноҳия роҳпаймоӣ таҳти унвони «Ҷавонон -пайрави Пешвои миллат» доир гардид. Дар ин бора аз бахши ҷавонон, варзиш ва сайёҳии ноҳия ба хабарнигори АМИТ «Ховар» иттилоъ доданд.
Дар ҳамоиши мазкур аз ҷониби ҷавонон муроҷиатномаи ҷавонони ноҳияи Файзобод перомуни эълон гардидани Соли ҷавонон қабул гардид, ки дар он, аз ҷумла, чунин омадааст: «Мо ҷавонони ноҳияи Файзобод дар қатори ҳазорҳо ҷавонони кишвар тамоми донишу малака ва ҳунару маҳорати худро баҳри он равона менамоем, ки дастуру ҳидоятҳои Сарвари давлатро дар амал татбиқ намуда, ҳамеша сазовори боварии Пешвои миллат бошем».