Баррасии дастгирии молиявии «Лоиҳаи ислоҳоти таҳсилоти тиббӣ»-и Швейтсария дар Донишгоҳи тиббӣ

ДУШАНБЕ, 13.02.2017 /АМИТ «Ховар»/. Зимни мулоқоти ректори Донишгоҳи давлатии тиббии Тоҷикистон ба номи Абӯалӣ ибни Сино Маҳмадшоҳ Гулзода бо роҳбари «Лоиҳаи ислоҳоти таҳсилоти тиббӣ» аз Швейтсария Хелен Притерх масъалаи дастгирии машваратӣ, амалӣ ва молиявии Лоиҳаи мазкур мавриди муҳокима қарор гирифт. Дар ин бора ба хабарнигори АМИТ «Ховар» аз Донишгоҳи давлатии тиббии Тоҷикистон хабар доданд.
Маҳмадшоҳ Гулзода, ректори Донишгоҳи давлатии тиббии Тоҷикистон зикр намуд, ки бо дастгирии Лоиҳа донишгоҳ дар самтҳои гуногун, ба монанди амаликунии соли таҳсили клиникӣ, беҳтар кардани сатҳу сифати раванди омӯзиш, омӯзонидани донишандӯзӣ ва малакаҳои амалию муоширатии касбии донишҷӯён, рушди Маркази омӯзиши малакаҳои амалии донишгоҳ бо баланд бардоштани самаранокии истифодаи технологияи муосири симулятсионӣ дар ҷараёни донишандӯзӣ ва малакаҳои амалӣ, ҳамчунин харидорӣ ва воридсозии адабиёти иловагии таълимию методӣ ва ғайраҳо ноил гаштааст.
Хелен Притерх, Роҳбари Лоиҳа аз Швейтсария иброз дошт, ки таҳти роҳбарии ректори донишгоҳ ва дастгирии кормандони Лоиҳа дар ҳамаи самтҳо пешравиҳои сермаҳсули таълимӣ ба даст оварда шуданд.