Дар Суғд ба ифтихори 20-солагии Рӯзи Ваҳдати миллӣ 120 рӯзи ободонӣ эълон гардид

ХУҶАНД,08.02.2017. /АМИТ «Ховар»/. Дар вилояти Суғд тибқи қарори Раиси вилояти Суғд баҳри сазовор пешвоз гирифтани ҷашни 20-солагии Рӯзи Ваҳдати миллӣ ва ҳамзамон вусъат бахшидан ба корҳои созандагиву бунёдкорӣ, ободонию сабзазоркунӣ дар қаламрави вилоят 120 рӯзи ободонию хуррамгардонӣ эълон гардид.
Тавре ба АМИТ «Ховар» аз шуъбаи ташкилии мақомоти иҷроияи ҳокимияти давлатии вилоят иттилоъ доданд, тибқи қарори мазкур воҳидҳои сохтории мақомоти иҷроияи ҳокимияти давлатии вилоят ва шаҳру ноҳияҳо вазифадор карда мешаванд, ки бо мақсади таҷлили солгарди Рӯзи Ваҳдати миллӣ, вусъат бахшидан ба корҳои созандагиву бунёдкорӣ, ободонию сабзазоркунӣ, таъмиру тармими биноҳои маъмурию истиқоматӣ, кӯчаву хиёбонҳо, гулгашту боғҳои фароғатию мавзеъҳои истироҳатӣ тадбирҳои зарурӣ андешанд.
Инчунин тоза кардани маҳалли зист аз партовҳо бо назардошти гузаронидани ҳашарҳои мардумӣ бо иштироки ҷомеаҳои меҳнатии корхонаҳо, ташкилотҳо, муассисаҳо, хоҷагиҳо ва шаҳрвандон дар назар дошта шудааст.