Иқдоми саршор аз меҳр: «Ало, салом модар, ман туро дӯст медорам!»

ДУШАНБЕ, 10.02.2017 /АМИТ «Ховар»/. Дирӯз бо ташаббуси Раёсати ҷавонон, варзиш ва сайёҳии вилояти Хатлон дар шаҳри Қӯрғонтеппа бо ҷалби волонтёрон иқдоми тарбиявии «Ало, салом модар, ман туро дӯст медорам!» ба муносибати Соли ҷавонон ва Рӯзи Модар баргузор карда шуд. Дар ин бора Беҳрӯз Бобоев, сармутахассиси бахши варзиш ва сайёҳии Раёсати ҷавонон, варзиш ва сайёҳии вилояти Хатлон иттилоъ дод.

Бино ба иттилои манбаъ, 4 гурӯҳ волонтёрон иборат аз 6 нафарӣ, бо либосҳои махсус ва рамзи Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон дар даст макет бо навиштаҷоти номи иқдом ва телефонҳои мобилӣ, аз 4 самти шаҳр-терминали Қӯрғонтеппа, варзишгоҳи «Ҷавонӣ», бозори марказӣ ва Донишгоҳи давлатии Қӯрғонтеппа ба номи Носири Хусрав ба самти хиёбони Исмоили Сомонӣ ҳаракат намуда, бо сокинону меҳмонони шаҳр ҳамсуҳбат шуданд.

Волонтёрон ҳангоми суҳбат муқаддас будани модарро баён карда, аз роҳгузарон хоҳиш намуданд, ки бо телефони онҳо ба модари худ занг зада, суханони «Ало, салом модар, ман туро дӯст медорам!»- ро бо меҳр ба забон оранд.
Дар ҳамоиш беш аз 300 нафар сокинону меҳмонони шаҳр иштирок карданд.