Имрӯз бозии аввали «Дордой» бо «Ҳосилот»-и Фархор доир мегардад

ДУШАНБЕ, 21.02.2017 /АМИТ «Ховар»/. Имрӯз дар шаҳри Ӯши Қирғизистон дастаи «Дордой»-и Бишкек барандаи медалҳои нуқраи Чемпионати Тоҷикистон-дастаи «Ҳосилот»-и Фархорро дар дидори аввалини рақобатҳои плей-офии Ҷоми Конфедератсияи футболи Осиё (КФО) қабул мекунад. Бозӣ дар соати 14:00 ба вақти Душанбе оғоз меёбад.
Дирӯз дар нишасти матбуотӣ сармураббии дастаи «Ҳосилот» Муҳаммадҷон Ҳабибуллоев изҳор кард, ки ғолиб аз рӯи ду бозӣ муайян мегардад: «Мо дастаи «Дордой»-ро хуб омӯхтаем ва бозии ин дастаро бо «Балкан»-и Туркманистон дар ихтиёр дорем. Дар ҳайати дастаи «Дордой» шумораи 23-юм маҳорати хуб дорад ва бо ӯ легионери ӯзбекистонӣ -Алишер Азизов баробар бозӣ мекунад. Ин бозии муҳим барои легионерҳои ганагии дастаи мо ба ҳисоб меравад, зеро онҳо пештар барои дар ҳайати дастаи «Дордой» ҳунарнамоӣ кардан ба ин ҷо омада буданд, аммо роҳбарияти даста онҳоро напазируфт. Дар ин бозӣ онҳо бояд тавре ҳунарнамоӣ кунанд, ки масъулин аз қабул накардани онҳо таассуф хӯранд».
Иброҳим Рабиев, нимҳимоятгари «Ҳосилот», ки дар ин нишаст иштирок дошт, гуфт, ки мақсади даста ба даври гурӯҳӣ роҳхат гирифтан аст.
Дар нишасти матбуотӣ сармураббии «Дордой» Мурат Ҷумакеев аз вазъи ҳаво ва таъсири он ба бозӣ ҳарф зада, изҳор кард, ки «агар майдон хуб бошад, мо омодаем бозии зебо нишон диҳем. Дар бораи бозии «Ҳосилот» маълумоти зиёд дорем ва онро хуб омӯхтаем».
Бозии ҷавобии ин дастаҳо 28 феврал дар Варзишгоҳи марказии шаҳри Душанбе мегузарад. Аз рӯи натиҷаи ду вохӯрӣ дастаи ғолиб ба гурӯҳи «Д»-и Осиёи марказӣ, ки дастаҳои «Истиқлол»-и Душанбе, Алтин Асир»-и Туркманистон ва «Алай»-и Қирғизистон қарор доранд, ҳамроҳ мешавад.