Имрӯз Конференсияи ғайринавбатии ташкилотҳои ҲХДТ дар ноҳияи Исмоили Сомонӣ баргузор гардид

  ДУШАНБЕ, 24.02.2017. /АМИТ«Ховар»/. Имрӯз дар толори мақомоти иҷроияи ҳокимияти давлатии ноҳияи Исмоили Сомонӣ Конференсияи XXV ғайринавбатии ташкилотҳои ҲХДТ дар ноҳияи Исмоили Сомонӣ баргузор гардид.
Дар кори Конференсия масъалаҳои дар бораи ба роҳбарӣ гирифтан ва дар амал татбиқ намудани дастуру супоришҳои Президенти Ҷумҳурии Тоҷикистон, Раиси Ҳизби Халқии Демократии Тоҷикистон муҳтарам Эмомалӣ Раҳмон, ки дар вохӯрӣ бо масъулон ва фаъолони шаҳри Душанбе баён гардиданд, натиҷаҳои фаъолияти Кумитаи иҷроияи ҲХДТ дар ноҳияи Исмоили Сомонӣ дар давоми соли 2016 ва вазифаҳои минбаъдаи ташкилотҳои ҳизбӣ, интихоби аъзои Кумитаи иҷроияи ҲХДТ дар ноҳияи Исмоили Сомонӣ, пешбарии номзад ва вакилии Маҷлиси вакилони халқи шаҳри Душабе ва пешбарии номзадҳо ва вакилии Маҷлиси вакилони халқи ноҳияи Исмоили Сомонӣ баррасӣ гардиданд.
Тибқи банди 11, боби 4-и Оинномаи Ҳизби Халқии Демократии Тоҷикистон 4 нафар вакилон бо дарназардошти ба кори дигар гузаштанашон аз ҳайати КИ ҲХДТ дар ноҳияи Исмоили Сомонӣ бозхонд карда шуда, бо қарорҳои дахлдор чор вакили дигар ба ҳайати Кумитаи иҷроияи ҲХДТ дар ноҳияи Исмоили Сомонӣ интихоб карда шуданд.
Мутобиқи моддаҳои 24, 25 ва 48-и Қонуни конститутсионии Ҷумҳурии Тоҷикистон «Дар бораи интихоботи вакилон ба маҷлисҳои маҳаллии вакилони халқ» ва бандҳои 10 ва 11-и боби 4-и Оинномаи ҲХДТ ба ҷои вакили хориҷшуда номзадии иҷрокунандаи вазифаи раиси шаҳри Душанбе Рустами Эмомалӣ аз ҳавзаи интихоботии №25 ба вакилии маҷлиси вакилони халқи шаҳри Душанбе пешбарӣ гардид.
Дар Конференсия раиси Кумитаи иҷроияи ҲХДТ дар ноҳияи Исмоили Сомонӣ Насимҷон Расулзода оид ба фаъолияти минбаъдаи ҳизб дар ноҳияи Исмоили Сомонӣ суханронӣ намуда,  ҷиҳати иҷроиши саривақтии дастуру супоришҳои Раиси ҲХДТ муҳтарам Эмомалӣ Раҳмон дар назди онҳо вазифаҳои мушаххас гузошт.