Интихоби дурусти ҳамсар–кафили зиндагии бобақо ва бардавом

ШАҲРИНАВ, 25.02.2017 /АМИТ «Ховар»/.  Бо мақсади пешгирӣ аз ҳодисаҳои номатлуб, ҷудошавии оилаҳо, дуруст ва аз наздик фаҳмонидани Паёми Президенти Ҷумҳурии Тоҷикистон, қонуну қарорҳои Ҳукумати Ҷумҳурии Тоҷикистон бо ширкати раиси Суди ноҳияи Шаҳринав Муҳаббат Сайидзода, мудири бахши Сабти асноди ҳолати шаҳрвандӣ Нодира Дадабоева, мудири бахши кор бо занон ва оила Барно Раҳимова дар ҷамоатҳои шаҳраку деҳот ва муассисаҳои таълимии ноҳияи Шаҳринав силсилаи вохӯриҳо оғоз гардиданд.

Гурӯҳи таблиғотӣ дар бораи никоҳи хешутаборӣ, ки аллакай тибқи қонун манъ гаштааст, гузаштани муоинаи ҳатмии тиббӣ қабл аз хонадоршавӣ ва сари вақт гирифтани шаҳодатномаи таваллуд, маслиҳат ва машваратҳои судманд медиҳанд. Ин тадбирҳо барои тавлид, тарбия ва ба воя расонидани  насли солим кумак мерасонанд.

Тавре мудири САҲШ- и ноҳияи Шаҳринав Нодира Дадабоева иброз дошт, ҳанӯз масъалаи ҷудошавии оилаҳо нигаронкунанда аст. Агар дар соли сипаригардида 142 адад оилаҳо пош хӯрда бошанд, пас дар моҳи январи соли равон 17 адад оилаҳои ҷавон аз ҳам ҷудо гардиданд. Гурӯҳи таблиғотӣ корҳои фаҳмондадиҳӣ ва суҳбату вохӯриҳоро дар сатҳу сифати баланд ва мунтазам доир менамояд. Маҳз интихоби дурусти ҳамсар имкон медиҳад, ки зиндагии оилавӣ дар оянда бобақо ва бардавом бошад.