Кормандони милитсия бо шароити илмомӯзии донишҷӯён шинос шуданд

ДУШАНБЕ, 08.02.2017. /АМИТ «Ховар»/. Кормандони шуъбаи ҷавонони Хадамоти пешгирии ҳуқуқвайронкунӣ дар байни ноболиғон ва ҷавонони Вазорати корҳои дохилии Ҷумҳурии Тоҷикистон ҷиҳати таъмини иҷрои талаботи таҳсил дар мактабҳои олӣ дар Коллеҷи омӯзгории ба номи Хосият Махсумоваи Донишгоҳи давлатии омӯзгории Тоҷикистон ба номи Садриддин Айнӣ бо шароити таҳсили онҳо шинос шуданд.
Тавре аз Вазорати корҳои дохилӣ хабар доданд, зимни суҳбат бо омӯзгорону донишҷӯёни ин коллеҷ кормандони милитсия оид ба паҳлӯҳои гуногуни Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» изҳор намуданд, ки ин қонун падару модаронро вазифадор менамояд, ки барои саломатӣ, инкишофи ҷисмонӣ, маънавӣ ва ахлоқии фарзандон ғамхорӣ карда, онҳоро дар рӯҳияи ватанпарварӣ, эҳтироми падару модар, риояи арзишҳои милливу умумибашарӣ тарбия намоянд.
Зикр шуд, ки коллеҷ барои ҳар як ҷавон макони омӯзиши илму дониш ва маркази таълиму тарбия мебошад. Омӯзгорони он дар навбати худ ҷаҳонбинӣ, ҳисси ватандӯстиву зебоипарастӣ ва одобу ахлоқи ҳамидаи донишҷӯёнро такмил медиҳанд.
Дар суҳбат бо кормандони милитсия масъулини Коллеҷи омӯзгорӣ зикр намуданд, ки бурдани корҳои фаҳмондадиҳӣ дар муассисаҳои олии таълимӣ боиси дастгирӣ буда, он ҷиҳати пешгирии амалҳои номатлуб дар байни ҷавонон, хусусан донишҷӯён таъсири мусбат мерасонад.