«Мо пайрави Пешвои миллатем»-роҳпаймоии ҷавонон дар шаҳри Турсунзода

ТУРСУНЗОДА, 25.02.2017 /АМИТ «Ховар»/.  Бо ибтикори бахши ҷавонон, варзиш ва сайёҳии шаҳри Турсунзода дар майдони шоҳ Исмоили Сомонӣ роҳпаймоии ҷавонони шаҳр баргузор гардид. Ҷавонони саодатманд бо шиорҳои «Мо пайрави Пешвои миллатем» ва дигар шиору овезаҳо роҳпаймоӣ намуданд.

Тавре мудири бахши ҷавонон, варзиш ва сайёҳии шаҳри Турсунзода Умед Ҳалимов иброз дошт, бахши ҷавонон дар соли 2016 дар доираи «Барномаи рушди иҷтимоии ҷавонони шаҳри Турсунзода барои солҳои 2016-2018» дар ҳудуди шаҳр 123 чорабинӣ, аз ҷумла 72 суҳбату мулоқот, ҷамъомаду машварат ва 51 барномаҳои оммавию фарҳангӣ бо фарогирии 17 ҳазору 180 нафар наврасону ҷавонон баргузор намуд.

Хушбахтона, дар шаҳри Турсунзода барои истироҳату фаъолияти пурсамари ҷавонон тамоми шароит муҳайёст. Соли гузашта боғи нави фарҳангию фароғатӣ — «Наврӯзгоҳи баҳори истиқлол» барои аҳолӣ ва хоса барои ҷавонон ба истифода дода шуд.

Имрӯзҳо ҷавонони шаҳри Турсунзода, ки беш аз 100 нафарро ташкил медиҳанд, барои сазовор истиқбол намудани Наврӯзи байналмилалӣ ва 20-солагии Рӯзи Ваҳдати миллӣ фаъолияти пурсамар доранд.