Мулоқоти Неъматулло Ҳикматуллозода бо Питер Фернандес оид ба рушди ҳамкории дуҷониба

ДУШАНБЕ, 10.02.2017 /АМИТ «Ховар»/. Дирӯз Неъматулло Ҳикматуллозода, Вазири рушди иқтисод ва савдои Ҷумҳурии Тоҷикистон бо Питер Фернандес, Роҳбари намояндагии Вазорати рушди байналмилалии Британияи Кабир дар Осиёи Марказӣ мулоқот намуд. Дар ин бора аз Вазорати рушди иқтисод ва савдо хабар доданд.
«Зимни мулоқот ҷонибҳо атрофи ҳадаф ва афзалиятҳои «Стратегияи миллии рушди Ҷумҳурии Тоҷикистон барои давраи то соли 2030», инчунин масъалаҳои вобаста ба рушди ҳамкории дуҷониба дар соҳаҳои кишоварзӣ, саноат, гидроэнергетика, сайёҳӣ, татбиқи лоиҳаҳои нав, дастгирии бахши хусусӣ ва сармоягузорӣ мубодилаи афкор намуданд»,- иттилоъ дод манбаъ.
Дар анҷоми вохӯрӣ тарафҳо азми қавии худро ҷиҳати густариши минбаъдаи ҳамкорӣ байни Вазорати рушди иқтисод ва савдои Ҷумҳурии Тоҷикистон ва Вазорати рушди байналмилалии Британияи Кабир баён доштанд.