Неймарро барои қаллобӣ ба додгоҳ мекашанд

ДУШАНБЕ, 21.02.2017/АМИТ «Ховар»/. Шикояти ҳамлагари дастаи «Барселона» ва мунтахаби Бразилия- Неймарро суд рад кардааст ва акнун ин бозингари шӯҳратёр ба додгоҳ кашида мешавад. Дар ин бора ESPN хабар медиҳад.
Фонди инвеститсионии DIS, ки қисме аз ҳуқуқи харидуфурӯши Неймарро соҳиб буд, даъво кардааст, ки Неймар ҳангоми ба КФ «Барселона» гузаштанаш ҳаққи ӯро пурра надодааст. Ин амалиёт соли 2013 ҳангоми гузариши Неймар аз КФ «Сантос» ба «Барселона » рух додааст.
Маблағи расмии интиқоли Неймар ба «Барселона» 57 миллион евроро (60,6 миллион доллар) ташкил мекард, аммо баъдан муайян гардид, ки ин трансфер арзиши бештар доштааст. Ба ҷавобгарӣ ҳамчунин КФ «Сантос», «Барселона» ва ширкати ба падари Неймар мансуббуда кашида мешаванд.
Прокурор барои ин амалаш ба Неймар то 2 сол ҳукми зиндон ва 10 миллион евро (10,6 миллион доллар) ҷарима дархост кардааст. Собиқ дастаи пешинаи ин бозингар ва дастаи ҳозирааш низ эҳтимол аст ба маблағи то 15 миллион евро (15,9 млн. доллар) ҷарима шаванд.
Дар ҳайати «Барселона» Неймар ду маротиба чемпиони Испания ва як маротиба ғолиби Лигаи чемпионҳои Аврупо (2014/2015) гардидааст.