Ҷоизаи ба номи Исмоили Сомонӣ олимони ҷавонро интизор аст

ДУШАНБЕ, 13.02.2017 /АМИТ «Ховар»/. Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон барои дарёфти ҷоизаи ба номи Исмоили Сомонӣ дар соли 2017 байни олимони ҷавон озмун эълон менамояд.
Дар озмун олимоне, ки дар соҳаи илму техника, тадқиқоти илмӣ барои инкишофи илмҳои бунёдӣ, гуманитарӣ, техникӣ, табиатшиносӣ, тиб ва азхудкунии техникаю технологияи пешқадам корҳои намоёнро анҷом додаанд, метавонанд иштирок намоянд.
Тавре аз Кумитаи ҷавонон, варзиш ва сайёҳӣ ба АМИТ «Ховар» хабар доданд, қабули ҳуҷҷатҳо то 15 апрели соли равон сурат гирифта, дар озмун олимони ҷавони то 35- сола метавонанд иштирок кунанд.