Шариф Назарзода: «Соли 2017 соли мубориза бар зидди ҷинояткорист»

ДУШАНБЕ, 09.02.2017. /АМИТ «Ховар»/. Дар доираи амалигардонии Сратегия ва «Барномаи ислоҳоти милитсия дар Ҷумҳурии Тоҷикистон барои солҳои 2014-2020» аз ҷониби мақомоти корҳои дохилии вилояти Суғд роҳбарияти мақомот ба ин самт таваҷҷуҳи хоса зоҳир ва дар фаъолияти фаврӣ-хизматӣ аз усулҳои нав корбарӣ менамоянд.
Тавре аз мақомоти корҳои дохилии вилояти Суғд хабар доданд, бо мақсади татбиқи муқаррароти Барномаи ислоҳоти милитсия роҳбарияти мақомоти корҳои дохилии вилояти Суғд тасмим гирифтанд аз фаъолияти мақомот охири ҳар моҳ натиҷагирӣ намоянд.
Дар вилояти Суғд зимни ҷаласаи ҷамъбастӣ оид ба фаъолияти милитсияи вилоят масъалаҳо оид ба самтҳои пешгирӣ ва ошкорнамоии ҷинояткорӣ, амалияи маъмурӣ, роҳ надодан ба ҷиноятҳои коррупсионӣ ва баррасии фаъолияти зерхадамоти пешгирии ҳуқуқвайронкунӣ байни ноболиғону ҷавонон дар шаҳру ноҳияҳои вилоят баррасӣ гардиданд.
Дар ҷаласа сардори РВКД дар вилояти Суғд Шариф Назарзода соли 2017-ро барои кормандони милитсияи вилояти Суғд «Соли мубориза бар зидди ҷинояткорӣ» унвон кард. Инчунин дар ҷаласа аз фаъолияти хадамоти фаврӣ, тафтишот, ҳифзи тартиботи ҷамъиятӣ, кор бо ноболиғону ҷавонон ва дигар самтҳои хизматӣ натиҷагирӣ карда шуд.
«Берун набаромадан аз ҳадди ваколатҳои хизматӣ ва роҳ надодан ба амалҳои коррупсионӣ дастуру супоришҳое мебошанд, ки бояд ҳар як корманди мақомоти корҳои дохилӣ аз чунин рафтор худдорӣ намояд», — таъкид гардид дар ҷаласа.