Таъсиси гурӯҳи кории соҳаи варзиш баҳри иҷрои дастурҳои Пешвои миллат

ДУШАНБЕ, 16.02.2017. /АМИТ «Ховар»/. 15 феврали соли равон дар толори Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон таҳти раёсати Аҳтам Абдуллозода, Раиси Кумита бо мақсади иҷрои саривақтии дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки дар мулоқот бо масъулин ва фаъолони шаҳри Душанбе иброз намуданд, ҷаласаи корӣ баргузор карда шуд. Дар ин бора ба АМИТ «Ховар» аз Кумитаи ҷавонон, варзиш ва сайёҳӣ хабар доданд.
Дар ҷаласа Аҳтам Абдуллозода иброз намуд, ки зимни мулоқот Пешвои миллат Эмомалӣ Раҳмон бо масъулин ва фаъолони шаҳри Душанбе дар самти соҳаи тарбияи ҷисмонӣ ва инкишофи варзиш, ҷиҳати оммавигардонии он, дар ҳамкорӣ бо соҳибкорону тоҷирони бонангу номус, бунёди мактабҳо ва муассисаҳои томактабӣ, толорҳо ва майдону марказҳои варзишӣ, инфрасохтори туристӣ ва фарҳангиву фароғатӣ, мусоидат ба густариши тарзи ҳаёти солим ва мақсаднок ба роҳ мондани фаъолияти муассисаву марказҳои варзишӣ, инчунин танзими нархи хизматрасонӣ барои наврасону ҷавонон супоришҳои мушаххас доданд.
Дар робита ба ин мулоқот барои амалӣ намудани супоришҳои Пешвои миллат дар ҳамкорӣ бо мақомоти иҷроияи ҳокимияти давлатии шаҳри Душанбе гурӯҳи корӣ таъсис дода шуда, нақшаи бартарафкунии камбудиҳо ва таъмини иштироки оммавии сокинон дар машқҳои пагоҳирӯзӣ, саҳни хобгоҳи донишгоҳу донишкадаҳо, майдончаҳои гуногуни варзишии маҳаллаҳо, ҷалби бештари дастпарварони муассисаҳои томактабӣ, мактабӣ ва олӣ ба он, ҷиҳати таҷлили рӯзи шанбе ҳамчун рӯзи варзиш ва солимгардонӣ тасдиқ гардид.