Тоҷикистон дар Намоишгоҳи дизайнерии «Амбиенте-2017» ширкат мекунад

ДУШАНБЕ, 09.02.2017./АМИТ «Ховар»/. Дар Намоишгоҳи байналмилалии молҳои истеъмолӣ «Ambiente-2017» («Амбиенте-2017») ғурфаи Тоҷикистон амал хоҳад намуд. Ин Намоишгоҳ рӯзҳои 10-14 феврали соли 2017 дар шаҳри Франфурти соҳили Майни Германия  баргузор мегардад. Дар ин бора ба АМИТ «Ховар» аз Сафорати Ҷумҳурии Тоҷикистон дар Ҷумҳурии Федеративии Германия  хабар доданд.

Мавриди зикр аст, ки  «Амбиенте» бузургтарин намоишгоҳи молҳои истеъмолӣ дар дунё мебошад. Ҳар сол садҳо нафар мутахассисони дизайни (зебосозии) муҳити кору хона ва декораторҳои ҳирфавӣ  барои иштирок кардан дар ин ҳамоиш ба Франкфурти соҳили Майн мераванд. Ва ҳар сол ин Намоишгоҳ таҳти сарпарастии ин ё он кишвари узви Иттиҳоди Аврупо доир мешавад. Порсол сарпарасти Намоишгоҳ Италия буд, имсол ҳамоиш таҳти нишони дизайни Британияи Кабир мегузарад.

Намоишгоҳи имсола аз се бахш иборат аст: 1) Dining – зебосозии ошпазхона, зарфҳо, мизу курсӣ; 2) Guving – туҳфаҳо, лавозимот ва ороишот, банду баст ва ғайра; 3)Living – асбобу анҷоми меҳмонхона: мебел, ашёи декорт, ҷиҳози хона. Аз рӯи ин се бахш ҷоизаҳои асосии Намоишгоҳ супорида мешаванд.