«Ҷуз сухани ганҷ магӯ…» дар саҳнаи Аҳорун

ДУШАНБЕ. 11.02.2017. /АМИТ «Ховар»/. Аҳли эҷоди Театри «Аҳорун» имрӯзҳо бо таҳияи намоиши нав бо номи «Ҷуз сухани ганҷ магӯ…» машғул буда, ният доранд, ки онро то охири моҳи ҷорӣ манзури тамошобинон гардонанд.
Тавре ба АМИТ «Ховар» аз маркази матбуоти Вазорати фарҳанги Ҷумҳурии Тоҷикистон хабар доданд, намоиш аз ҷониби Шӯрои бадеии театр қабул гардида, сабки хоси театр дар шакли манзум ба роҳ монда шудааст. Муаллиф Шамсия Қосимова онро дар асоси осори Мавлоно Ҷалолиддини Балхӣ ва Ҳаким Абӯалӣ Сино таҳия намудааст. «Ҷуз сухани ганҷ магӯ» дар бораи зиндагии ориф ва олими шинохтаи Шарқ Абӯалӣ ибни Сино нақл мекунад.
Коргардони намоиш Ҳунарпешаи халқии Тоҷикистон Сабоҳат Қосимова иброз дошт, ки алҳол корҳои ороишӣ, тамрин ва таҳияи декор, ки ҳунари кандакориро талаб мекунад, идома доранд.