Ёде аз Абдуалим Ҳайдаров- дурдонаи пурҷилои илми химияи тоҷик

ДУШАНБЕ, 10.02.2017 /АМИТ «Ховар»/. Дар Донишгоҳи давлатии омӯзгории Тоҷикистон (ДДОТ) ба номи Садриддин Айнӣ бахшида ба 70-солагии Абдуалим Ҳайдаров, узви вобастаи Академияи илмҳои байналмилалии мактабҳои олӣ, номзади илмҳои биологӣ ҷамъомади озод доир гардид.
Абдусамад Муллоев, муовини Ректори ДДОТ оид ба корҳои илмӣ, доктори илмҳои филологӣ, профессор зимни ҷамъомад гуфт: «Ман фикр мекунам, ки Абдуалим Ҳайдаров дар зиндагӣ давлати бузурге дошт, ки ӯро насиб гардида, неруманд, покизарӯзгор ва машҳур гардонид. Ин давлат илм буд, ки мавсуф онро ба нафъи халқу Ватан ва илми тоҷик сарф кард. Устод Ҳайдаров дар ташкили мактаби химикон дар Донишгоҳи давлатии омӯзгории Тоҷикистон ва дар рисолати инсонию омӯзгорӣ намунаи ибрат буд».
«Устод Абдуалим Ҳайдаров аз аввалин қадами фаъолияти мустақилона то вопасин нафаси худ бо Донишгоҳи омӯзгорӣ буд. Ӯ дар тӯли зиёда аз 40 соли фаъолият дар ин даргоҳи муътабар пайваста ба корҳои таълиму тарбияи шогидон ва пажӯҳиши таърихи илми кимиё машғул шуда, китобу дастурҳои таълимӣ ва рисолаву мақолаҳои зиёде навиштааст»,-иброз дошт профессор Сироҷиддин Бандаев оид ба фаъолияти педагогӣ ва илмию ҷамъятии Абдуалим Ҳайдаров.
Дар ҷамъомад ҳамкасбон ва дӯстони зиндаёд Абдуалим Ҳайдаров доир ба ҳаёт ва рӯзгори ӯ хотироти хешро баён карданд.