Зариф Мирдадо ба ҷавонон: «Барои ояндаи неки Тоҷикистон талош намоед!»

ДУШАНБЕ, 09.02.2017 /АМИТ «Ховар»/. Дирӯз Зариф Мирдадо, иҷрокунандаи вазифаи раиси ноҳияи Ашт дар истироҳатгоҳи ба номи «20-солагии Истиқлолияти Ҷумҳурии Тоҷикистон» дар ноҳияи Ҷаббор Расулов бо донишҷӯёни фаъол мулоқот доир намуд.
Тавре аз Хадамоти матбуоти Раиси ноҳияи Ашт хабар доданд, зимни мулоқот Зариф Мирдадо гуфт: «Ҷавонӣ давраи пешрафт, омӯхтани касбу дониш ва мустаҳкам сохтани мавқеи худ дар ҷомеа мебошад. Шумо ҷавонон, ки неруи пешбарандаи ҷомеа ҳастед, ҳама талошҳои худро барои ояндаи нек ва дурахшони Тоҷикистон азиз сарф намоед ва ба боварию эътимоди Пешвои миллат, муҳтарам Эмомалӣ Раҳмон нисбат ба насли ҷавон содиқ бошед».
«Аз шомил шудан ба равияҳои тундгаро, ки оқибат ба пушаймонӣ меорад, худдорӣ намуда, аз ҳама он имкониятҳое, ки давлату Ҳукумат бароятон муҳайё намудааст, истифода баред ва мутахассиси кордон гардед»,- зикр кард Зариф Мирдадо.