Дар Тоҷикистон бадминтон рӯ ба инкишоф мениҳад

ДУШАНБЕ, 30.03.2017/АМИТ «Ховар»/. Бозии бадминтон дар Тоҷикистон рӯ ба инкишоф мениҳад. Ин дар ҳолест, ки тайи солҳои соҳибистиқлолӣ дар кишвар соҳаҳои гуногуни варзиш, ки дар ҷаҳон маъмулу машҳуранд, эҳё мегарданд. Ҳукумати мамлакат ба рушду инкишофи соҳаҳои олимпии варзиш таваҷҷуҳи бештар зоҳир мекунад ва бадминтон низ шомили бозиҳои олимпист ва дар ҷумҳурӣ ҳаводорони зиёд дорад. Бо мақсади тақвият бахшидан ба мактаби мураббиёни ин намуди варзиш семинари омӯзишӣ дар Мактаби байналмилалии Душанбе таи як ҳафта барои мураббиён ва варзишгарони соҳаи бадминтон дар доираи барномаи «Вақти волан» ба роҳ монда шуд.
Дар ин маъракаи манфиатовар мураббии созмони осиёии федератсияи бадминтон ба 25 нафар мураббиёни маҳаллӣ аз усулу навгониҳои соҳа дарс гуфт. Баъди анҷоми машғулиятҳо мураббиён ҳуҷҷати тасдиқкунандаи бозомӯзиро дарёфтанд. Ҳамзамон барои дар вилояти Бадахшон таъсис додани намояндагии Федератсияи бадминтон ба масъулини минтақаи номбурда лавозими бадминтон тақдим гардид. Бо ин иқдом дар вилояти Бадахшон ба рушду инкишофи ин риштаи варзиш ҳамакнун заминаи муътамад гузошта шуд.
Бадминтонбозони вилоятҳои Суғду Хатлон аллакай ба дастовардҳои назаррас ноил шуда, дар баробари иштирок дар мусобиқоти дохили кишвар, имкон пайдо кардаанд, ки дар мусобиқоти Осиё низ зери Парчами Тоҷикистон ҳунарнамоӣ кунанд.
Марҳалаи омӯзишии мазкур ба андешаи таҳлилгарони соҳа, боз як гоми устуворест дар самти тақвияту тавсеаи ин намуди олимпии зебову нодири варзиш дар Тоҷикистон, ки ҳадафи аслии роҳбарияти Федератсияи миллии бадминтони мамлакат аз ҳамин ихтисос мегирад.