Наврӯз бе назм ва назм бе Наврӯз тасаввурнопазиранд!

ДУШАНБЕ, 21.03.2017 /АМИТ «Ховар»/. Бо қарори ЮНЕСКО шурӯъ аз соли 1999 ҳамасола 21 март ҳамчун Рӯзи умумиҷаҳонии назм (World Poetry Day) ҷашн гирифта мешавад. Бори аввал ин ҷашн дар Париж, ки штаб — квартираи ЮНЕСКО он ҷо воқеъ гардидааст, ҷашн гирифта шуд.
«Таҷлили Рӯзи умумиҷаҳонии назм барои қадрдонии шоирон, эҳё намудани анъанаҳои шифоҳии қироат, таваҷҷуҳ ба хонишу таълими назм, омезиши он бо дигар навъҳои санъат, аз қабили театр, рақс, мусиқӣ ва рассомӣ ва инъикоси васеи он дар ВАО мусоидат менамояд. Назм қудрати ба ҳам овардани инсонҳоро дар ҳамаи қитъаҳои олам дорад. Ба ин ҷашн ҳамроҳ шавед!»- гуфтааст Ирина Бокова, директори генералии ЮНЕСКО дар паёмаш ба муносибати ҷашнгирии ин рӯз дар соли 2017.
«Дар Тоҷикистон ин рӯз бо тантанаву шукӯҳи зиёд ҷашн гирифта мешавад. Басо рамзист, ки Рӯзи умумиҷаҳонии назм бо ҷашни Наврӯзи оламафрӯз ба як рӯз рост омадааст. Барои мардуми тоҷик Наврӯз бе назм ва назм бе Наврӯз тасаввурнопазир аст. Дар ин рӯз шоирон бо шеъри нобашон гули сари сабади ҳама гуна базму тараби наврӯзиянд. Иттифоқи нависандагони Тоҷикистон имрӯз Рӯзи умумиҷаҳонии назмро бо ҷашни Наврӯз якҷо ҷашн мегирад»,- гуфт Ато Мирхоҷа, муовини якуми раиси Иттифоқи нависандагони Тоҷикистон.
Ато Мирхоҷа ҳамчунин зикр кард, ки мардуми тоҷик табиатан табъи шоирӣ дошта, ашъори Рӯдакиву Фирдавсӣ, Хайёму Саъдӣ, Ҳофизу Бедил ва дигарон назми ӯро оламгир кардаанд.